Pune News : मोटारसायकलच्या धडकेमुळे बिबट्याचा मृत्यू

नारायणगाव- येथील पुणे नाशिक महामार्गावरील वारुळवाडी बाह्यवळण रस्त्यावर भरधाव वेगाने जाणाऱ्या मोटारीची धडक बसल्याने बिबट्याचा मृत्यू झाला. मृत बिबट्या (मादी) डोक्याला गंभीर दुखापत झाली होती. घटनास्थळी मोठ्या प्रमाणात रक्तस्राव झाला होता. ही घटना पहाटेच्या सुमारास झाली.

या बाबतची माहिती मिळाल्यानंतर पहाटे पाच वाजण्याच्या सुमारास नारायणगाव पोलीस स्टेशनचे रात्र गस्ती पथकातील पोलीस दिनेश साबळे, होमगार्ड राहूल सातपुते, पोलीस मित्र भरत मुठे, होमगार्ड संदेश खोकराळे, पोलिस पाटील भुजबळ घटनास्थळी आले. त्या नंतर पोलीस अधिकारी साबळे यांनी या बाबतची माहिती वनविभागाला दिली.

शवविच्छेदन करण्यासाठी मृत बिबट्याला माणिकडोह येथील बिबट निवारा केंद्रात नेण्यात आले. वाहनाच्या धडकेत वन्य प्राणी मृत होण्याची मागील वर्षभरातील या भागातील ही पाचवी घटना आहे. अशी माहिती पोलिस पाटील सुशांत भुजबळ यांनी दिली. पुणे नाशिक महामार्गावरील बाह्यवळण रस्त्यावर हॉटेल अथर्व समोर आज पहाटेच्या सुमारास मृत बिबट्या आढळून आला.