देशभरात दिवाळीत १० वर्षांतील विक्रमी उलाढाल; ऑल इंडिया ट्रेडर्सची माहिती

पुणे - यंदाच्या दिवाळी ग्राहकांनी मोठ्या प्रमाणात खरेदी केल्याने देशभरात मालाची विक्रमी विक्री झाली आहे. गेल्या १० वर्षांचा विक्रम मोडीत काढत १ लाख २५ हजार कोटी रुपयांची उलाढाल झाली आहे. एकट्या दिल्लीत सुमारे २५ हजार कोटींचा व्यवसाय झाला आहे, अशी माहिती कॉन्फेडरेशन ऑफ ऑल इंडिया ट्रेडर्सचे (सीएआयटी) राष्ट्रीय अध्यक्ष बी. सी. भारतीया आणि सरचिटणीस प्रवीण खंडेलवाल यांनी दिली आहे.

गेल्या दोन वर्षांपासून दिवाळीत मंदी आली होती, त्यामुळे बाजारपेठेत उठाव नव्हता. पण यंदाच्या आकडेवारीने दिवाळीच्या दिवशी गेल्या १० वर्षांतील विक्रीचा विक्रम मोडला असून, मातीचे दिवे, कागदी दिवे, मेणबत्त्या इत्यादी पारंपरिक दिवाळीच्या वस्तूंना जास्त मागणी असल्यामुळे भारतीय कारागिरांचा चांगला व्यापार झाला. याशिवाय गृह सजावटीच्या वस्तू, मिठाई, ड्रायफ्रूट्स, कपडे, शूज, घड्याळे, खेळणी अशा इतर उत्पादनांची मागणीही मोठ्या प्रमाणात होती. व्यापारी आता १४ नोव्हेंबरपासून सुरू होणाऱ्या लग्नाच्या हंगामासाठी सज्ज झाले आहेत. तसेच यंदा दिवाळीत नागरिकांनी स्वदेशी वस्तू खरेदीवर भर दिल्याने चीनचे सुमारे ५० हजार कोटींचे नुकसान झाले आहे, असा दावा भारतीया व खंडेलवाल यांनी केला.

पुण्यात गेले दीड वर्ष कोरोनामुळे बाजारपेठ ठप्प होती; परंतु या वर्षी ग्राहकांनी स्थानिक बाजारपेठेतील खरेदीला प्राधान्य दिले, त्यामुळे सर्व व्यापारी वर्गाला ही दिवाळी नवसंजीवनी देणारी ठरली आहे. यंदा घरगुती व्यवसायाला चांगला प्रतिसाद मिळाला आहे, असे पुणे जिल्हा रिटेल व्यापारी संघाचे अध्यक्ष सचिन निवंगुणे यांनी सांगितले.