'जुन्नरला सलून दुकाने पाच जूनपासून सुरू करणार'

जुन्नर : जुन्नर तालुका ग्रामीण नाभिक विकास संस्थेने सलून व पार्लर दुकानांवर घातलेली बंदी उठवण्याची मागणी मुख्यमंत्री उद्धव ठाकरे यांच्याकडे केली आहे. आम्हाला शुक्रवार दि.४ जून पर्यंत व्यवसाय सुरु करण्याची परवानगी द्यावी अन्यथा सलुन व्यवसायिक दि. ५ जून रोजी दुकान सुरु करतील यानंतर प्रशासनाने दुकानावर कायदेशीर कारवाई केल्यास सहकुटुंब जेलभरो आंदोलन करु असा इशारा देण्यात आला आहे. याबाबतचे निवेदन तहसील कार्यालय तसेच पोलीस प्रशासनास देण्यात आले आहे.

नाभिक समाज हा ९० टक्के भुमीहीन तर १० टक्के अल्पभुधारक आहे. सलुन व पार्लर या व्यवसायावर कुटुंबाची उपजिविका अवलंबून आहे.बंदीच्या आदेशामुळे नाभिक समाजावर उपासमारीची वेळ आली आहे. गेल्या वेळी पाच महिने व्यवसाय बंद होता. समाजातील २७ हुन अधिक व्यावसायिकांनी कर्ज बाजारी पणामुळे आत्महत्या केली असल्याचे निवेदनात म्हटले आहे. समाजास कोणत्याही प्रकारची आर्थिक मदत, दुकानभाडे, लाईटबील माफी, मुलांची शाळा/ कॉलेज शुल्क माफ करण्यात आले नाही. त्यात दुसरा लॉकडाऊन लावण्यात आल्याने सलुन व्यावसायिकांवर अन्याय होत आहे असल्याचे निवेदनात म्हटले आहे.

जुन्नर तालुका ग्रामीण नाभिक विकास संस्थेचे अध्यक्ष अरुण क्षीरसागर, उपाध्यक्ष सचिन कोळेकर, कार्याध्यक्ष सुनिल खंडागळे यांंच्या सहीने निवेदन देण्यात आले. सरकार सलुन व्यवसाय बंदच ठेवणार असेल तर सर्व नाभिक व्यवसायिकांना दरमहा वीस हजार रुपये पॅकेज द्यावे. मुलांना शाळा/कॉलेज शुल्क माफ करण्यात यावे.वीजबिल माफ करण्यात यावे. घरभाडे, दुकानाचे भाडे व घरपट्टी हे माफ करण्यात यावे अशा मागण्या करण्यात आल्या आहेत.