न्यायालयाला खोटी माहिती देवून पोटगी मिळविण्याचा प्रयत्न फोल

हडपसर, ता. २ : शिक्षण, नोकरी आणि बँक खात्यासह पोटगी मिळत असल्याची बाब न्यायालयापासून लपवून पुन्हा अंतरिम दावा करणाऱ्या महिलेचा पोटगी मिळविण्याचा प्रयत्न फोल ठरला आहे. न्यायालयाने पत्नीचा त्यासाठीचा दावा फेटाळून लावला आहे.
येथील कौटुंबिक न्यायालयात पती विनय (नाव बदललेले आहे) यांच्यातर्फे घटस्फोटासाठी याचिका प्रकरण दाखल करण्यात आले आहे. त्याच्या सुनावणीत पत्नी राणी (नाव बदललेले आहे) हिने प्रथमवर्ग न्यायालयाकडून मंजूर झालेली पोटगीची बाब न्यायालयापासून लपवून ठेवण्याचा प्रयत्न केला.
पत्नी राणी हिने याअगोदर सेलू येथील प्रथमवर्ग न्यायदंडाधिकारी यांच्या कोर्टात पती विनय यांच्या विरोधात कौटुंबिक हिंसाचारापासून महिलांचे संरक्षण कायद्यानुसार अर्ज करून दोन्ही प्रकरणांत पोटगी मंजूर करून घेतली आहे. असे असतानाही तिने पुन्हा दरमहा पंचवीस हजार रुपये अंतरिम पोटगी मिळावी म्हणून अर्ज दाखल केला होता, परंतु या प्रकरणातील जाब देणार पत्नी हिने पूर्वीची माहिती लपवून ठेवली होती. याशिवाय स्वतःचे शिक्षण, नोकरी आणि बँक खाते याबाबतही न्यायालयाला शपथेवर खोटी माहिती दिली.
दरम्यान, याचिकाकर्ते पती विनय यांच्यातर्फे युक्तिवाद करीत असताना ॲड. अनंत कच्छवे आणि ॲड. दीपा सातव यांनी ही बाब न्यायाधीश एस. बी. यादव यांच्या निदर्शनास आणून दिली. त्याची दखल घेऊन राणी यांचा अंतरिम पोटगी अर्ज फेटाळण्यात आला.