व्यावसायिकाचा खून करणारे 'ते' दोघे...

खडकवासला (पुणे) : नऱ्हे येथील हॉटेल व्यावसायिकाचा मागील आठवड्यात अज्ञात व्यक्तींनी खून केला होता. यातील दोन आरोपींना ताब्यात घेतले आहे. ग्रामीण दहशतवाद विरोधी पथक व सिंहगड रोड पोलिस स्टेशन यांनी ही संयुक्त कारवाई केली.

सुनील लांगोरे (वय 40, रा. नांदोशी, खडकवासला) या व्यक्तीचा शुक्रवारी (ता. 12) रोजी खून झाला होता. त्यादिवशी याबाबत अनोळखी व्यक्तींविरुद्ध सिंहगड पोलिस ठाण्यात गुन्हा दाखल करण्यात आला आहे. या प्रकरणी संतोष रामचंद्र नाक्ती (रा. गाऊडदरा ता. हवेली, जि. पुणे वय -२८) व सुधीर राजाराम कामठे (रा. कुसगाव ता. भोर जि. पुणे वय- २४) यांना भोर तालुक्यात जाऊन ताब्यात घेतले आहे. पुणे ग्रामीण दहशतवाद विरोधी पथकाचे सहाय्यक पोलीस निरीक्षक अर्जुन मोहिते हे आपल्या पथकासह खेड- शिवापूर परिसरात गस्त करीत होते. त्यांच्यातील कर्मचारी मोसिन शेख यांना गोपनीय बातमी मिळाली की, नऱ्हे पुणे शहर येथील एका व्यावसायिकाचा खून करून फरारी झालेले दोन्ही आरोपी भोर तालुक्यातील कुसगाव या ठिकाणी एका शेतामध्ये झोपडी सारख्या घरांमध्ये लपून बसले आहेत.

याबाबत, खात्रीशीर माहिती मिळाल्यानंतर त्याच परिसरामध्ये आरोपींच्या शोधात असलेले सिंहगड रोड पोलिस स्टेशनचे गुन्हे शाखा पथकाचे सहाय्यक पोलीस निरीक्षक चेतन थोरबोले यांच्याशी संपर्क केला. त्यांच्या पथकास घेऊन आरोपींना माहिती मिळालेल्या ठिकाणी सापळा रचून ताब्यात घेतले. पुढील कारवाई करण्यासाठी सिंहगड रोड पोलिस स्टेशनच्या ताब्यात देण्यात आले.

लांगोरे यांचे नऱ्हे येथील सिद्धीविनायक क्रांती पार्क जवळ स्वराज रेस्टॉरंट नावाचे हॉटेल होते. याबरोबरच गॅस सिलिंडर वितरणाचाही व्यवसाय होता. लॉकडाउनमुळे लांगोरे यांचे हॉटेलही बंद होते. तरीही ते शुक्रवारी सायंकाळी त्यांच्या नऱ्हे येथील हॉटेलच्या

परिसरात थांबले होते. त्यावेळी लांगोरे यांच्यावर कोयत्याने वार करण्यात आले होते.

या हल्ल्यात त्यांच्या डोक्यावर, तोंडावर वार केल्याने त्यांचा जागीच मृत्यू झाला. या घटनेनंतर आरोपी तेथून पळून गेले होते.

पुण्याच्या बातम्या वाचण्यासाठी येथे क्लिक करा

सिंहगड रोड पोलिस स्टेशनचे वरिष्ठ पोलिस निरीक्षक नंदकुमार शेळके यांच्या मार्गदर्शनाखाली पुणे ग्रामीण दहशतवाद विरोधी पथकाचे सहायक पोलीस निरीक्षक अर्जुन मोहिते व सिंहगड रोड पोलीस स्टेशनचे सहाय्यक पोलीस निरीक्षक चेतन थोरबोले, पोलिस उपनिरीक्षक सुधीर घाडगे, सहाय्यक पोलिस उपनिरीक्षक राजू पवार, पोलिस शिपाई किशोर शिंदे, निलेश कुलथे, पोलिस नाईक विशाल भोरडे, मोसिन शेख, लक्ष्मण राऊत व सिंहगड रोड पोलीस स्टेशनचे गुन्हे शाखा पथक यांनी कारवाई केली.