मोबाईल आणला नाही म्हणून काकाने केला पुतण्यावर चाकू हल्ला

पुणे : दुसऱ्या खोलीतून फोन आणण्यास नकार दिल्याने काकाने आपल्या पुतण्यावर चाकूने जीवघेणा हल्ला (Knife attack) केला. पोलिसांनी आरोपी काकाला अटक केली आहे. काका आणि पुतण्या पुण्यातील मार्केट यार्ड परिसरात एकाच घरात राहतात. पीयूष दीपक शर्मा (वय १७) असे जखमी पुतण्याचे नाव आहे. संजय गोकुळ परदेशी (वय ३८) असे आरोपी काकाचे नाव आहे.

मिळालेल्या माहितीनुसार, पीयूष, संजय व आजी हे तिघेही मार्केट यार्डातील आनंदनगर परिसरात राहतात. संजय हा मजुरीचे काम करतो. पीयूष हा संजयचा पुतणा आहे. त्याचे आई-वडील वेगळे राहतात. तो आजी आणि काकांकडे राहतो. संजयने पुतण्यावर हल्ला केल्याची तक्रार मीना परदेशी (वय ६५) यांनी पोलिस ठाण्यात दिली, अशी माहिती प्रकरणाचा तपास करणारे मार्केट यार्ड पोलिस ठाण्याचे पोलिस उपनिरीक्षक युवराज शिंदे (Pune) यांनी सांगितले.

रविवारी रात्री ८.३० वाजताच्या सुमारास संजयने ने पीयूषला दुसऱ्या खोलीतून मोबाईल घेऊन येण्यास सांगितले. मात्र, पीयूषने मोबाईल आणून दिला नाही. यामुळे चिडलेल्या संजयने त्याच्या पोटावर चाकूने वार (Knife attack) केले. सध्या पीयूषची प्रकृती स्थिर असल्याचे सांगण्यात येत आहे. पोलिसांनी आरोपींविरुद्ध भारतीय दंड संहितेच्या कलम ३०७, ५०४ आणि महाराष्ट्र पोलीस अधिनियम कलम ३७(१)(३) अन्वये १३५ अन्वये गुन्हा दाखल केला आहे.