दिव्यांग विद्यार्थ्यांसाठी 'यूजीसी'ने उचलली पावले; आता विद्यापीठांसह शिक्षण संस्थांवर राहणार मोठी जबाबदारी!

पुणे : दिव्यांग विद्यार्थ्यापर्यंत उच्च शिक्षणाच्या संधी पोचविण्यासाठी विद्यापीठ अनुदान आयोगाने प्रयत्न सुरू केले आहेत. केंद्र सरकारच्या दिव्यांग विद्यार्थ्यांसाठी शिष्यवृत्तीसह शिक्षणाच्या योजना पोचविणे सर्व विद्यापीठांसह शिक्षण संस्थेला बंधनकारक असेल.

राज्यसभेच्या संसदीय स्थायी समितीने केंद्र सरकारला केलेल्या शिफारशींचा दाखला देत विद्यापीठ अनुदान आयोगाने सर्व विद्यापीठांना यासंबंधी पत्र पाठविले आहे. त्यानुसार दिव्यांगांना दिल्या जाणार्‍या शैक्षणिक सवलतींबाबत जागृती करणे, तसेच प्रत्येक विद्यापीठे आणि शिक्षण संस्थेच्या संकेतस्थळावर या योजना आणि सवलतींची माहिती देण्यासाठी वेगळा ‘सेक्शन’ ठेवणे बंधनकारक करण्यात आले आहे.

- 'सीईटी' परीक्षेचं काहीच ठरेना; विद्यार्थ्यांसोबत आता पालकांचही वाढलंय टेन्शन!​

राज्यसभेच्या संसदीय स्थायी समितीने उच्च शिक्षणासाठी 2020-21 करिता निधी मागणी यावर अहवाल दिला आहे. त्यात मनुष्यबळ विकास मंत्रालयाने दिव्यांग विद्यार्थ्यांसाठी केलेल्या योजनांबाबत समाधान व्यक्त करताना, या पुढाकारामुळे अशा विद्यार्थ्यांना शिक्षणाच्या समान संधी मिळाली आहे. या योजनांबाबत अधिक जनजागृती केली, तर त्याचा प्रभावी परिणाम दिसेल. त्यामुळे शैक्षणिक संधीबाबत दिव्यांग विद्यार्थ्यांमध्ये जागृती करण्याचा प्रत्येक प्रयत्न केला पाहिजे, असे म्हटले आहे.
दिव्यांगांसाठी असलेल्या सर्व योजनांचा तपशील हा विद्यापीठ अनुदान आयोग, अखिल भारतीय तंत्र शिक्षण परिषद, सर्व विद्यापीठांच्या संकेतस्थळावर प्रसिद्ध करणे बंधनकारक करावे. तसेच या योजनांची योग्यरितीने प्रत्येक शिक्षण संस्थेत अंमलबजावणी होते की नाही यावर काटेकोर आणि सातत्याने लक्ष ठेवण्याची गरजही समितीने व्यक्त केली आहे. 

- कोरोनामुळे थांबले 'देणाऱ्यांचे हजारो हात'; सामाजिक संस्थांची झाली 'दुबळी झोळी!'​

शिक्षण हे आता वैश्‍विक होत आहे. त्यामुळे शिक्षण संस्थांनी शिक्षणाच्या आंतरराष्ट्रीयकरणावर भर दिला पाहिजे. यातून त्यांना नव्या संधी निर्माण होतील. याबरोबरच जागतिक दर्जाचे उद्दिष्ट गाठण्यासाठी महाविद्यालये आणि विद्यापीठांनी त्यांच्याकडील मनुष्यबळ सक्षम केले पाहिजे. शिक्षणात दर्जाला सर्वोच्च प्राधान्य असले पाहिजे. सध्याच्या काळासाठी गरज असलेले, नवे कौशल्य आणि व्यापक ज्ञान असलेले पदवीधर निर्माण केले पाहिजेत, असे मत समितीने नोंदविले आहे.

दिव्यांगांना शिक्षणाच्या मुख्य प्रवाहात आणण्यासाठी विद्यापीठाने विविध योजना राबविलेल्या आहेत. आता त्यांच्यासाठी असलेल्या योजनांची माहिती संकेतस्थळाबरोबर त्यांच्यापर्यंत पोचविण्यासाठी विद्यापीठ अनुदानाच्या सूचनेनुसार सर्वतोपरी प्रयत्न केले जातील.
- डॉ. प्रफुल्ल पवार (कुलसचिव, सावित्रीबाई फुले पुणे विद्यापीठ)

 - पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)