विठ्ठलवाडी बंधार्‍यावरून उसाचा ट्रॅक्टर घसरून एकाचा मृत्यू

तळेगाव ढमढेरे - विठ्ठलवाडी (ता. शिरूर) येथील भीमा नदीवरील कोल्हापूर पद्धतीच्या बंधार्‍यावरून उसाची वाहतूक करणारी ट्रॉली व ट्रॅक्टर घसरून एकाचा मृत्यू झाल्याची दुर्घटना घडली आहे. घटनेची नोंद शिक्रापूर पोलीस स्टेशनमध्ये करण्यात आली आहे. विठ्ठलवाडीहुन पाटेठाणकडे ऊस घेऊन ट्रॅक्टर चालला होता. सोपान गोरे हा ट्रॅक्टर चालक अपघातातून वाचला असून, चालकाच्या शेजारी बसलेले उत्तम छबूराव नाटकर (वय ५०, रा. गांधीनगर, राहू, ता. दौंड)  यांचा मृत्यू झाल्याचे पोलिसांनी सांगितले. 

विठ्ठलवाडी येथील भीमा नदीवरील कोल्हापूर पद्धतीचा बंधारा जड वाहतूक करण्यासाठी धोकादायक असून, बंधाऱ्यावरील रस्त्याची दुरुस्ती करण्याची मागणी ग्रामपंचायतीने केली होती. बंधाऱ्यावरील धोकादायक वाहतुकी संदर्भात दै. सकाळने छायाचित्रासह  वेळोवेळी बातम्या प्रसिद्ध करून जनजागृती केली होती. परिणामी गेल्या वर्षभरापासून पाटबंधारे विभागाने  या बंधाऱ्यावरील जड वाहनांची वाहतूक बंद केली होती.

पुण्यातील इतर बातम्या वाचण्यासाठी क्लिक करा

पर्यायी व्यवस्था म्हणून पिंपरी सांडसच्या नवीन पुलावरून जड वाहतूक करण्यास पाटबंधारे विभागाने सांगितले होते. त्यासाठी विठ्ठलवाडी बंधाऱ्याच्या प्रवेशद्वाराजवळ पाटबंधारे विभागाने बॅरिकेड लावले होते परंतु  पिंपरी सांडस येथील रस्ता वाहन चालकाला  दूर वाटत असल्याने अज्ञात व्यक्तीने विठ्ठलवाडी बंधाऱ्यावरील  बॅरिकेड  रात्रीच्या वेळी खोदून काढले,  तेव्हापासून  पुन्हा या पुलावरून जड वाहनांची  वाहतूक  सुरू झाली. त्यानंतर  ग्रामस्थांनी  बॅरिकेड काढल्याची तक्रार पाटबंधारे विभागाकडे  केली होती. 

हे वाचा - दिवाळीत घरफोड्या करणाऱ्या चोरट्यांना अटक; 29 लाख रुपयांचा मुद्देमाल जप्त

बंधाऱ्याचे बांधकाम ४० वर्षांपूर्वी झाले असून, हा पूल जड वाहतुकीसाठी धोकादायक असल्याचा खुलासा पाटबंधारे विभागाने केला असूनही नागरिकांनी बॅरिकेड काढून पुन्हा जड वाहतूक सुरू  केली आहे. शिरूर, दौंड व हवेली तालुक्याला जोडणारा हा बंधारा असून, मोठ्या प्रमाणात वाहतूक चालते. या बंधाऱ्यावरून जड वाहनांची वाहतूक त्वरित बंद करून पुन्हा बॅरिकेड लावावे अशी मागणी ग्रामस्थांनी केले आहे.