Raj Thackeray Pune: राज ठाकरे पुण्यात बैठक न घेता संतापून का निघून गेले? पडद्यामागे नेमकं काय घडलं? सविस्तर वाचा...

Raj Thackeray Pune:

पुणे: पुणे लोकसभा मतदारसंघाचा आढावा घेण्यासाठी मनसेचे अध्यक्ष राज ठाकरे आज (ता. ३) दुपारी पक्ष कार्यालयात आल्यानंतर अनेक पदाधिकारी उपस्थित नव्हते, बैठकीला सुरुवात होत नव्हती. त्यामुळे संतापलेले ठाकरे थेट पक्ष कार्यालयातून निघून गेल्याची घटना घडली. त्यामुळे मनसेच्या कार्यकर्त्यांमध्ये एकच खळबळ उडाली आहे. दरम्यान, पक्ष प्रवक्त्यांनी राज ठाकरे नाराज होऊन गेले नाहीत असा दावा केला आहे.

राज ठाकरे हे पुणे दौऱ्यावर असल्याने त्यांनी लोकसभा निवडणुकीच्या पार्श्‍वभूमीवर शहरातील विधानसभा मतदारसंघनिहाय बैठका घेण्याचे निश्‍चित केले. त्यासाठी शाखा प्रमुखांपासून ते संघटकांपर्यंतच्या पदाधिकाऱ्यांना बैठकीसाठी निरोप देण्यात आला होता. राज ठाकरे हे दुपारी दोनच्या सुमारासच नवी पेठेतील पक्ष कार्यालयात पोहचले.

राज्य पातळीवरचे काही पदाधिकारी सोडता इतर स्थानिक कार्यकर्ते, पदाधिकारी बैठकीपूर्वी पक्ष कार्यालयात पोहचले नाहीत. थोडा वेळ वाट पाहिली, अडीच वाजून गेले तरी बैठक सुरु झाली नाही. पक्ष कार्यालयाबाहेर प्रसार माध्यमांचे प्रतिनिधी ठाकरे यांच्याशी संवाद साधण्यासाठी उपस्थित होते. पण त्यांनी मला माध्यंमांसोबत काही बोलायचे नाही, असे पदाधिकाऱ्यांमार्फत निरोप पाठवला. (Latest Marathi News)

त्यानंतरच काही वेळात संतापलेले राज ठाकरे यांनी ही बैठक वेळेत सुरु करायची नव्हती तर, मला इथे कशाला बोलावले? असा जाब पदाधिकाऱ्यांना विचारत कार्यालयातून बाहेर पडले. त्यानंतर ते थेट मुंबईच्या दिशेने रवाना झाले असे सूत्रांनी सांगितले.

याबाबत पक्षाचे प्रवक्ते योगेश खैरे म्हणाले, ‘‘बैठकीला उशीर झाला म्हणून राज ठाकरे नाराज होऊन निघून गेलेले नाहीत. त्यांनी काही संघटकांशी चर्चा सुरु केली होती, पण त्यांना जशी माहिती अपेक्षीत होती, तशी माहिती मिळत नसल्याने त्यांनी तुम्ही आणखी तयारी करून पदाधिकाऱ्यांशी चर्चा करा. त्यानंतर मी बैठक घेतो असे सांगितले त्यानंतर ते कार्यालयातून बाहेर पडले. राज ठाकरे गेल्यानंतर आम्ही मतदारसंघनिहाय बैठका घेतल्या आहेत.