Bank Layoffs : टेक कंपन्यांनंतर आता बँक कर्मचाऱ्यांना मिळणार नारळ; 'या' बँकेत होणार मोठी कर्मचारी कपात

Citigroup Layoffs News : काही दिवसांपूर्वी भारतातील आपला रिटेल बँकिंग व्यवसाय अॅक्सिस बँकेला विकणारी फर्म सिटीग्रुप आता मोठ्या प्रमाणावर कर्मचारी कपातीची तयारी करत आहे.

सिटीग्रुपने भारतासह जगभरातील सर्व कंपन्यांमधील शेकडो कर्मचाऱ्यांना काढून टाकण्याची योजना आखली आहे. त्यामुळे गुंतवणूक बँकिंग विभागातील अनेक क्षेत्रांना फटका बसणार आहे.

सिटीग्रुप आपल्या 2,40,000 कर्मचार्‍यांपैकी सुमारे एक टक्के कर्मचारी काढून टाकेल. ब्लूमबर्गच्या अहवालात असे म्हटले आहे की फर्मच्या ऑपरेशनल आणि तंत्रज्ञान संस्थांचे कर्मचारी देखील प्रभावित होतील.

अहवालात असे म्हटले आहे की कर्मचार्‍यांची कपात हा कंपनीच्या सामान्य व्यवसाय योजनेचा एक भाग आहे.

कंपनीने नोकऱ्या कमी करण्यामागे सर्वसमावेशक कारण दिलेले नसले तरी कंपनीला अनेक समस्यांचा सामना करावा लागत आहे.

कंपनीच्या प्रवक्त्यानेही याबाबत माहिती देण्यास नकार दिला आहे. सिटीग्रुपमधून काढून टाकण्याचा हा निर्णय स्पर्धक जेपी मॉर्गन चेस अँड कंपनीच्या शेकडो कर्मचार्‍यांच्या कामावरून काढून टाकल्यानंतर घेण्यात आला आहे.

कंपनीच्या महसुलात 53 टक्के घट :

यापूर्वी गोल्डमन सॅक्स ग्रुपने जानेवारीमध्ये सर्वात मोठी नोकर कपात केली होती. कंपनीने हजारो पदे रद्द करण्याची घोषणा केली होती. सिटीग्रुपने तंत्रज्ञान युनिटमध्ये अब्जावधी डॉलर्स खर्च केले आहेत.

दुसरीकडे, कंपनीला गुंतवणूक बँकिंगमध्ये मंदीचा सामना करावा लागत आहे. गेल्या वर्षीच्या व्यवसायापासून कंपनीच्या महसुलात 53 टक्क्यांची घट झाली असून आणखी घट होण्याची अपेक्षा आहे.

कंपनीचे मुख्य कार्यकारी अधिकारी जेन फ्रेझर यांनी जानेवारी दरम्यान दिलेल्या निवेदनात सांगितले की, आम्ही आमच्या संमती आदेशांची पूर्तता करण्यासाठी आणि आमच्या बँकेचे आधुनिकीकरण करण्यासाठी गुंतवणूक करत राहू.