LIC Q2 results: LIC ला मोठा झटका, कंपनीचा निव्वळ नफा 50 टक्क्यांनी घसरला, उत्पन्नही झाले कमी

LIC Q2 results: सार्वजनिक क्षेत्रातील विमा कंपनी लाइफ इन्शुरन्स कॉर्पोरेशन ऑफ इंडियाने (LIC) त्यांचे तिमाही निकाल जाहीर केले आहेत. यावेळी एलआयसी कंपनीचा नफा कमी झाला आहे. एलआयसीचा निव्वळ नफा निम्मा झाला आहे. कंपनीच्या उत्पन्नातही घट झाली आहे.

कंपनीचा निव्वळ नफा 50% ने घसरून 7,925 कोटी रुपये झाला. गेल्या आर्थिक वर्षाच्या याच तिमाहीत कंपनीचा निव्वळ नफा 15,952 कोटी रुपये होता. एलआयसीने शुक्रवारी शेअर बाजाराला दिलेल्या माहितीत सांगितले की, चालू आर्थिक वर्षाच्या जुलै-सप्टेंबर तिमाहीत त्यांचे निव्वळ उत्पन्न 1,07,397 कोटी रुपयांवर घसरले आहे.

LIC ने मे 2022 मध्ये सर्वात मोठा IPO आणला होता. कंपनीने 949 रुपये प्रति शेअर या भावाने बाजारातून पैसे उभे केले होते. परंतु शुक्रवारी, 10 नोव्हेंबर 2023 रोजी बाजार बंद झाल्यावर 949 रुपयांची किंमत असलेले शेअर्स 610 रुपयांवर बंद झाले.

याचा अर्थ गुंतवणूकदारांना त्यांच्या गुंतवणुकीवर 36 टक्के किंवा प्रति शेअर 339 रुपये तोटा सहन करावा लागत आहे. एलआयसीचे बाजार भांडवल 3.86 लाख कोटी रुपयांवर आले आहे. ज्या इश्यू प्राइसवर LIC ने IPO आणला होता, तिचे मार्केट कॅप 6 लाख कोटी रुपये होते. म्हणजेच LIC च्या बाजार भांडवलात 2.14 लाख कोटी रुपयांहून अधिक घट झाली आहे.

भारतीय आयुर्विमा महामंडळ (LIC) मार्फत लोकांना जीवन विमा दिला जातो. LIC च्या अनेक योजना आहेत ज्या जीवन विम्याशी संबंधित आहेत. याशिवाय एलआयसीकडे आरोग्य विमा योजनाही आहेत. अशा परिस्थितीत कंपनीच्या नफ्यात झालेली घसरण चिंताजनक आहे. एलआयसीच्या निव्वळ प्रीमियम उत्पन्नातही घसरण झाली आहे.