LIC: एलआयसी बनली जगातील सर्वात मजबूत विमा कंपनी; SBI-HDFC सह अनेक कंपन्यांना टाकले मागे

Worlds Top valuable Insurance Brands: विमा क्षेत्रातील सर्वात मोठी कंपनी लाइफ इन्शुरन्स कॉर्पोरेशन ऑफ इंडिया म्हणजेच LIC हा जागतिक स्तरावर मजबूत विमा कंपनी म्हणून उदयास आली आहे. ब्रँड फायनान्स इन्शुरन्स 100, 2024 च्या अहवालानुसार, LIC चे ब्रँड मूल्य 9.8 बिलियन डॉलर वर स्थिर आहे.

ब्रँड फायनान्स इन्शुरन्सने दिलेल्या निवेदनानुसार, कॅथे लाइफ इन्शुरन्स हा एलआयसीनंतरचा दुसरा सर्वात मजबूत ब्रँड आहे. कॅथे लाइफ इन्शुरन्सचे ब्रँड मूल्य नऊ टक्क्यांनी वाढून 4.9 अब्ज डॉलर आहे. त्यानंतर NRMA विमा आहे, ज्याचे ब्रँड मूल्य 82 टक्क्यांनी वाढून 1.3 अब्ज डॉलर झाले आहे. (LIC Emerges As Worlds Strongest Insurance Brand Report)

निवेदनानुसार, चीनच्या विमा ब्रँडने जागतिक क्रमवारीत आपला दबदबा कायम ठेवला आहे. पिंग एन ब्रँडचे चार टक्क्यांनी मूल्य वाढवून 33.6 अब्ज डॉलरपर्यंत गेले आहे. यानंतर, चायना लाइफ इन्शुरन्स आणि CPIC अनुक्रमे तिसऱ्या आणि पाचव्या स्थानावर आहेत.

एलआयसीचे 39,090 कोटी रुपयांचे प्रीमियम कलेक्शन

एलआयसी इंडियाने आर्थिक वर्ष 2022-23 मध्ये प्रथम वर्षाचे सर्वाधिक 39,090 कोटी रुपयांचे प्रीमियम कलेक्शन साध्य केले, तर SBI लाइफ इन्शुरन्स आणि HDFC लाइफ इन्शुरन्सने अनुक्रमे रु. 15,197 कोटी आणि रु. 10,970 कोटींचे नवीन प्रीमियम कलेक्शन केले.

एलआयसीचे शेअर्स सर्वकालीन उच्चांकावर

सरकारने ऑगस्ट 2022 पासून LIC कर्मचाऱ्यांसाठी 17 टक्के वेतन सुधारणेला मंजुरी दिली होती, ज्यामुळे 1,10,000 हून अधिक कर्मचाऱ्यांना फायदा झाला. LIC च्या शेअर्सनी देखील 1,175 रुपयांचा सर्वकालीन उच्चांक गाठला, ज्यामुळे ती भारतातील सर्वात मौल्यवान सार्वजनिक क्षेत्रातील उपक्रम (PSU) कंपनी बनली आहे.

एका अहवालानुसार, 2019 मध्ये देशातील 29 कोटी लोकांकडे LIC ची पॉलिसी होती. 15 ऑक्टोबर 2005 पर्यंत, LIC ने 1,01,32,955 नवीन पॉलिसी जारी करण्याचा आकडा ओलांडला होता.

एलआयसी नेटवर्क

आज LICच्या 2048 शाखा कार्यालये, 113 विभागीय कार्यालये, 8 क्षेत्रीय कार्यालये, 1381 सॅटेलाईट कार्यालयांसह व्यवसाय करत आहे.