Spicejet lay off: स्पाइसजेटचा मोठा निर्णय! 1,400 कर्मचाऱ्यांना काढून टाकणार; काय आहे कारण?

SpiceJet lay off: खर्चात कपात करण्यासाठी आणि गुंतवणूकदारांचे हित जपण्यासाठी स्पाइसजेट 1,400 कर्मचाऱ्यांना कामावरून काढून टाकण्याच्या तयारीत आहे. ही कपात कंपनीत काम करणाऱ्या एकूण कर्मचाऱ्यांच्या 15 टक्के असेल. एअरलाइनमध्ये सध्या 9,000 कर्मचारी आहेत आणि सुमारे 30 विमाने कार्यरत आहेत. (SpiceJet to lay off 1,400 employees in cost-cutting measure)

स्पाइसजेट अनेक महिन्यांपासून पगार देण्यास विलंब करत आहे. अनेकांना जानेवारीचे पगार अद्याप मिळालेले नाहीत. 60 कोटी रुपयांच्या पगाराच्या बिलाचा बोजा असल्याने कंपनीला हा निर्णय घ्यावा लागला आहे.

निधीची समस्या भेडसावत असलेल्या स्पाइसजेटला कर्मचाऱ्यांचे पगार वेळेवर देता येत नसल्याने कर्मचाऱ्यांना गेल्या अनेक महिन्यांपासून पगार मिळालेला नाही. कंपनी काही गुंतवणूकदारांकडून 2200 कोटी रुपयांचे भांडवल उभारण्याचा प्रयत्न करत आहे. (SpiceJet plans layoffs to stay afloat amid financial woes)

गुंतवणूकदारांचे हित जपण्यासाठी कंपनीवर खर्च कमी करण्याचा दबाव आहे. कंपनीतील सर्व कर्मचाऱ्यांचे पगार बिल 60 कोटी रुपये आहे. हे कमी करण्यासाठी एअरलाइन्स मोठ्या प्रमाणात कर्मचारी कपातीच्या तयारीत आहे.

स्पाईसजेट कर्मचारी कपातीची बातमी अशा वेळी आली आहे जेव्हा जगभरात कर्मचारी कपातीच्या प्रमाणात वाढ होत आहे. या वर्षाच्या सुरुवातीपासून कर्मचारी कपातीचा वेग वाढला आहे. ॲमेझॉन, गुगल, मायक्रोसॉफ्ट, सिस्को यांसारख्या अनेक मोठ्या कंपन्यांनी यावर्षी आपल्या कर्मचाऱ्यांना कामावरून काढून टाकले आहे.

जगभरात सुरू असलेल्या कपातीचा सर्वात जास्त परिणाम टेक कंपन्यांवर होत आहे. एका अहवालानुसार, जानेवारीमध्ये टेक कंपन्यांनी 32 हजारांहून अधिक लोकांना कामावरून काढून टाकले आहे.