सिल्व्हरबीज (शुक्रवारचा बंद भाव : रु. ७७.८७)

एकीकडे शेअर बाजारात ‘सेन्सेक्स’ व ‘निफ्टी’ निर्देशांक नवे उच्चांक गाठत असतानाच, गेल्या महिन्याभरात सोने आणि चांदी यांचे भावदेखील नवनवे उच्चांक नोंदवत होते. गेल्या आठवड्यात चांदीच्या भावाने नवा उच्चांक नोंदवला.

दीर्घावधीच्या आलेखानुसार, चांदीच्या भावात होत असलेल्या चढ-उतारांचा विचार करता, वायदे बाजारानुसार २०११ मध्ये प्रतिकिलो ७३,६०० रुपयांचा उच्चांक दर्शविल्यानंतर ३० एप्रिल २०११ पासून गेल्या १२ ते १३ वर्षे चांदीचा भाव मर्यादित पातळ्यांमध्येच हेलकावे घेत आहे. त्यामुळे गेल्या १३ वर्षांत चांदीमधील गुंतवणुकीतून मर्यादित परतावा मिळाला आहे.

चांदी हा एक मौल्यवान धातू आहे; तसेच चांदीचा वापर औद्योगिक क्षेत्रातदेखील केला जातो. स्मार्टफोन, सौर पॅनेल, इलेक्ट्रिक वाहने, ऑटोमोबाईल्स, इलेक्ट्रॉनिक्स, टीव्ही स्क्रीन, फाइव्ह-जी नेटवर्क, बायो-फार्मा; तसेच वैद्यकीय तंत्रज्ञानातील महत्त्वपूर्ण अनुप्रयोगांसह, चांदीची औद्योगिक मागणी वाढत आहे.

आलेखानुसार, गेल्या आठवड्यात ७७,९४९ रुपये या पातळीच्या वर चांदीने बंद भाव दिल्याने दीर्घावधीसाठी तेजीचे संकेत मिळत आहेत. या तेजीच्या संकेतांमुळे दीर्घावधीमध्ये चांदीच्या भावातदेखील मोठ्या प्रमाणात वाढ होऊ शकते, ज्याकडे गुंतवणूकदारांनी जरूर लक्ष ठेवावे.

गुंतवणूकदारांसाठी चांदीमध्ये गुंतवणूक करण्याच्या दृष्टीने सोयीस्कर आणि किफायतशीर ‘एक्सचेंज ट्रेडेड फंड’ (ईटीएफ) हा मार्गदेखील उपलब्ध आहे. चांदीच्या ‘ईटीएफ’चा शेअर बाजारात व्यवहार केला जातो.

डी-मॅट आणि ट्रेडिंग खात्यासह, गुंतवणूकदार लहान मूल्यांमध्ये ‘ईटीएफ-युनिट’ खरेदी; तसेच विक्री करू शकतात. दीर्घावधीसाठी ‘निप्पॉन इंडिया सिल्व्हर ईटीएफ-सिल्व्हरबीज’ या एक्स्चेंज ट्रेडेड फंडात अर्थात ‘सिल्व्हरबीज’च्या स्वरूपात चांदीतदेखील जोखीम लक्षात घेऊन मर्यादित प्रमाणात गुंतवणूक करण्याचा गुंतवणूकदार विचार करू शकतात.

(डिस्क्लेमर ः या लेखातील माहिती अभ्यासाच्या दृष्टिकोनातून दिली गेली आहे. प्रत्यक्ष व्यवहार करताना जोखीम ओळखून वैयक्तिक गुंतवणूक सल्लागाराचा सल्ला घेणे आवश्यक आहे.)