KP Green IPO : ‘केपी ग्रीन’ ठरला सर्वांत मोठा एसएमई आयपीओ

मुंबई : गुजरातच्या केपी ग्रीन इंजिनिअरिंग लि. या कंपनीने आणलेल्या १९० कोटींच्या एसएमई आयपीओमध्ये १३७ ते १४४ रुपये किंमतपट्टा निश्चित केला असून, त्यात १५ ते १९ मार्चदरम्यान गुंतवणूक करता येईल. यात किमान एक हजार शेअरसाठी व त्यापुढे एक हजार शेअरच्या पटीतच अर्ज करावा लागेल.

इशूमधील पन्नास टक्के शेअर पात्र संस्थात्मक गुंतवणूकदारांना तर पंधरा टक्के शेअर बड्या वैयक्तिक गुंतवणूकदारांना आणि ३५ टक्के शेअर रिटेल गुंतवणूकदारांना मिळतील. हा इशू १९० कोटी ५० लाख रुपयांचा असून हा भांडवली बाजाराच्या इतिहासातील सर्वात मोठा एसएमई आयपीओ आहे.

यातील निधीतून कंपनीची उत्पादन क्षमता वाढवण्यासाठी आणि विस्तारासाठी नवीन युनिट स्थापनेसाठी १५६ कोटी वापरले जातील. ही कंपनी के. पी. ग्रुपची प्रमुख कंपनी असून डॉ. फारुखभाई पटेल यांनी १९९४ मध्ये या कंपनीची स्थापना केली.

महसूल ११४ कोटींवर

गुजरातच्या केपी ग्रीन इंजिनिअरिंग लि. या कंपनीकडे स्वच्छ ऊर्जा क्षेत्रात १५ वर्षांपेक्षा जास्त अनुभव असून त्यांच्याकडे २३३ कोटींच्या ऑर्डर सध्या आहेत. मागील आर्थिक वर्षात त्यांनी साडेबारा कोटी रुपयांचा नफा कमवला आहे. तो मागील वर्षीपेक्षा साडेचार कोटी रुपयांनी जास्त आहे. कंपनीचा महसूल ७७ कोटी रुपयांवरून मागील वर्षी ११४ कोटी रुपयांपर्यंत गेला.