वडापाव ट्रिप! (ढिंग टांग)

बेटा : (नेहमीची सॉलिड एण्ट्री) ढॅणटढॅऽऽण...मम्मा, आयॅम बॅक!
मम्मामॅडम : (कागदपत्रं हातावेगळी करण्यात मग्न...) हं!
बेटा : (कमरेवर हात ठेवत) मी कुठे जाऊन आलो, विचारलं नाहीस!!
मम्मामॅडम : (मान वर न काढता) कशी झाली मुंबईची ट्रिप?
बेटा : (विजयी मुद्रेने) ॲज युज्वल...फॅण्टॅस्टिक आणि ग्रेट! आय कॉल इट वडापाव ट्रिप!! हा गेलो, हा आलो!!
मम्मामॅडम : (सुस्कारा सोडत) ह्यावेळी लोकल गाडीत बसला नाहीस ना? मागल्या खेपेला त्या गर्दीत-
बेटा : (आरशात बघत) नोप! ह्यावेळी नो लोकल बिझनेस! मी बाय रोड फिरलो!!
मम्मामॅडम : (सहजगत्या) एवढ्या गाड्या नि घोडे दिमतीला असताना तुम्हा लोकांना लागतात कशाला रे रेल्वेगाड्या? मी तर एकदाही बसले नाही त्या मुंबईच्या लोकलमध्ये!!
बेटा : (टुकटुक करत)...मी एक मस्त रिक्षा राइड एन्जॉय केली!!
मम्मामॅडम : (धसका घेत) ओह गॉड! मुंबईच्या रिक्षावाल्यानं गंडवलं नाही ना तुला?
बेटा : (डोळे मिचकावत) उलट मीच त्याला गंडवलं!!
मम्मामॅडम : (हताशपणे) तू ज्या दिवशी कुणाला गंडवशील, खरा नेता होशील!! तू मनानं चांगला आहेस, म्हणून तर-
बेटा : (साफ दुर्लक्ष करत) रिक्षावाल्याला म्हटलं, ‘एअरपोर्ट चलोगे?’ तो म्हणाला, ‘क्‍यों नहीं? जरूर जाएंगे’ मी म्हटलं, ‘तो फिर जाते क्‍यों नही?’ हाहा!!
मम्मामॅडम : (सुस्कारा सोडत) जुना जोक आहे रे हा!!
बेटा : (उजळलेल्या चेहऱ्यानं) बरं नवा जोक सांगतो!! त्या रिक्षावर काय लिहिलं होतं माहितीये?
मम्मामॅडम : (कंटाळून) रिक्षावर हल्ली काहीही लिहितात!
बेटा : (खुश होत...) ‘मां का आँचल!’ हाहा!! खरंच सांगतोय! नो जोक!! मी रिक्षातून उतरलो तर तो रिक्षावाला पैसे घ्यायला तयार होईना!! म्हणाला, ‘‘आपकीही गाडी है समझो! आपसे क्‍या पैसा लेना?’’
मम्मामॅडम : (किंचित नाराजीनं) मुंबईत तू पाच मिनिटांत पत्रकार परिषद गुंडाळलीस म्हणे! माझ्याकडे तक्रारी आल्या आहेत!! पत्रकार सक्‍काळी उठून आले होते तुझ्यासाठी! तू काही बोललाच नाहीस म्हणे!!
बेटा : (खांदे उडवत) त्यात काय बोलायचंय? नोटाबंदी, जीएसटी, श्रीमंतांची कर्जमाफी, पेट्रोलचे भाव...विषय संपला!! ह्या पलीकडे ह्या देशात बोलण्यासारखं आहे तरी काय?
मम्मामॅडम : (समजूत घालत) एक कायम लक्षात ठेव...पत्रकारांना कधीही सकाळी बोलावू नये!! फार चडफडतात!! दुपारी किंवा संध्याकाळी बोलवावं! हे म्हंजे सुग्रास पार्टीचं आमंत्रण देऊन वडापाव पुढे करण्यासारखं झालं!!
बेटा : (आपली बाजू मांडत) वडापाव मी त्यांना दिला नाही, त्यांनी मला दिला!! तोच घाईघाईत खाऊन मी तिथून नांदेडला निघालो!! आता ह्यात माझं काय चुकलं?
मम्मामॅडम : (नाद सोडत) मुंबईतले पत्रकार तुला वाटतात तितके सोपे नाहीत हं! डू नॉट अंडरएस्टिमेट द पावर ऑफ मुंबईकर पत्रकार!!
बेटा : (अचानक काहीतरी आठवल्यासारखं...) मम्मा, डू यू नो वन थिंग...मोदीजी मला जाम घाबरतात!
मम्मामॅडम : (घाबरून) कोणी सांगितलं हे तुला?
बेटा : (आत्मविश्‍वासानं) चेहऱ्यावर दिसतं ना त्यांच्या!!
मम्मामॅडम : (घाईघाईनं विषय बदलत) तुला भूक लागली असेल तर फ्रीजमध्ये पास्ता ठेवलाय!
बेटा : (पोटावरून हात फिरवत) छे, पाच वडापाव पोटात आहेत माझ्या!!
मम्मामॅडम : (आवंढा गिळत)...आज आपली इफ्तार पार्टी आहे ना? तू स्वत: यजमान आहेस!
बेटा : (विचार करत) पण तिथंही पाच मिनिटं उभ्या उभ्या जाऊन येऊ!! आहे काय नि नाही काय!!