ढिंग टांग : खबरदार जर टांच मारुनी..!

श्रावणातली टळटळीत दुपार. मुदपाकखान्यातून कुकरची शिट्टी ऐको आली, पाठोपाठ कारल्याची भाजी परतल्याचा गंध दर्वळला. राजियांनी नेत्र घट्ट मिटोन घेतले. आता महिनाभर हेच ग्रहण करायचे….हर हर हर हर!! गवाक्षातून बाहेर नजर टाकत राजियांनी ताबडतोब आक्रमणाची मसलत मनोमन सुरु केली. औंदा मैदान मारायचेच. काहीही होवो, शेंडी तुटो, वा पारंबी! .आतापर्यंत जाहले, ते जाहले. यापुढे फजीत होवोन परतायचे नाही. रणमैदानातून फत्ते पावोनच माघारी यावयाचे. विजयाच्या नुसत्या कल्पनेने खट खट खट खट ऐसा ध्वनी अंत:पुरात घुमला. राजियांनी चमकोन पाहिले. बाराबंदीचे दो-चौ बंद छाताड फुगल्यामुळे खटाखट तुटले होते…‘कोण आहे रे तिकडे? पप्याऽऽ..,’ राजियांनी हाळी दिली. कदीम सेवक पप्याजी फर्जंद पडेल मुद्रेने हाजिर झाला.‘तोंड का असं पडलंय?,’ राजियांनी विचारले.‘काही नाही…आज कारल्याची भाजी आहे! कोबीचा ऑप्शन होता, पण-,’ फर्जंदाने कारण सांगितले. राजियांनी घाईघाईने विषयाला हात घातला..‘झट की पट आमच्या अष्टप्रधान मंडळास बलाऊ धाडावे! म्हणावे, मोठी मसलत पार पाडावयाची आहे. मोहीम ठरवणे आहे..,’ राजियांनी फर्मान सोडले. फर्जंदाने ते तत्परतेने झेलले.हिंदीसक्तीची विल्हेवाट लावोन जीत हासिल केल्यानंतर राजियांचे बाहू नुसते फुरफुरुं लागले होते. आता एकेक मैदान मारत सुटायचे, या कल्पनेने त्यांच्या अंगी बारा हत्तींचे बळ आले होते...‘पनवेलीस काय झटापट जाहली?,’ अचानक राजियांनी पुशिले. खिश्यातून रुमाल काढोन आधी कपाळ पुशिले, आणि मग हे पुशिले!!.पप्याजी फर्जंदाने उत्साहाने बित्तंबातमी दिली. त्याने टीव्हीवर सारे काही पाहिलेच होते. तो सांगो लागला, ‘नाइट जार नावाच्या हवेलीत सवंग नाचकाम चालत असोन रायगड जिल्ह्याचे भूमीत छछोर धंदे चालू असल्याची खबर आपल्या महाराष्ट्रसैनिकांस लागली.तेथील काही निवडक शिलेदारांनी जल्द अज जल्द घोडियांस टांच देवोन नाइटजार हवेलीवर येकच सुलतानढवा केला. चहुबाजूंनी हवेलीस कोंडिले, आणि हवेलीच्या अभेद्य काचांवर पाषाणास्त्रांचा अपरंपार मारा करोन ती अपशकुनी वास्तू तहसनहस करोन टाकिली!’‘शाब्बास रे माझ्या वाघांनो!,’ राजियांनी मनोमन आपल्या शिलेदारांची पाठ थोपटली..‘हे सारे आपल्या भाषणामुळे झाले, राजेसाहेब!’ फर्जंदाने विनम्रपणे सांगितले. ते खरे होते. प्रात:काळी जेथ राजियांनी नाचकामगृहांच्या विरोधात जहरी भाष्य केले, तेथेच तात्काळ ‘खळ्ळ खट्याक’चा ध्वनी दुमदुमला. याला म्हंटात डायरेक्ट ॲक्शन! येथे भलते लाड चालत नाहीत…‘आम्हाला अर्बन नक्षल म्हणता काय! बघतोच आता एकेकाला..,’ राजे दातओठ खाऊन स्वत:शीच म्हणाले.‘कोण म्हणालं अर्बन नक्षल?’ भोळसट फर्जंदाने काहीही गरज नसताना शंका काढलीन! वेडा!!.‘अजून म्हटलं नाही म्हणोन काय जाहाले? आज नाही म्हटले तर उद्या म्हणतील! त्यांचा काय भरवसा?’ गरागरा डोळे फिरवीत राजियांनी पाइंटाचा मुद्दा काढला. तो अर्थातच पटण्याजोगा होता.‘पण का म्हणतील, ते आपणांस अर्बन नक्षल?,’ फर्जंदाला अजूनही काही टोटल लागेना. वेडा रे वेडा!‘म्हणतील! अगदी शंभर हिश्शांनी म्हणतील, जे कोणी विरोधात बोलतात, ते अर्बन नक्षल हे तो समीकरणच आहे ना?’ राजियांनी मुद्दा विस्कटून सांगितला..‘पण ते म्हणतात, तुम्ही नाहीच्च मुळे अर्बन नक्षल…मग?’’ फर्जंदाचा येळकोट जाईना.हिंदीसक्ती विरोधात अनुपमेय जीत जाहली, नाचकामकोठीचीही वासलात लागली. इजा झाला, बिजा झाला, आता तिजा नको?‘आता तिसरी लढाई अर्बन नक्षल!’ राजियांनी कठोर मुद्रा करोन पुढील रणनीती स्पष्ट केली. त्यातले अक्षरही बिचाऱ्या फर्जंदास कळले नाही. वेडा वेडा वेडा!.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.