भाजपमुळे वाढणार 'साविआ'ची डोकेदुखी; मनसुब्यांवर बोळा फिरण्याची शक्‍यता!

सातारा : पालिकेच्या सभागृहात भारतीय जनता पक्षाच्या नगरसेवकांनी आपले स्वतंत्र अस्तित्व आणि गट कायम राखला आहे. त्यामुळे यावेळी होणाऱ्या स्वीकृत नगरसेवकाच्या निवडीवेळीसुद्धा भाजप तटस्थ राहून आपल्याच विचारांचा नगरसेवक सभागृहात आणण्याच्या मानसिकतेत सध्या तरी आहे. भाजपने घेतलेल्या या भूमिकेमुळे सातारा विकास आघाडीची डोकेदुखी वाढणार असून, हद्दवाढीनंतरचा राजकीय समतोल राखण्याच्या त्यांच्या मनसुब्यांवर बोळा फिरण्याची शक्‍यता यामुळे निर्माण झाली आहे. 

सातारा पालिकेत सातारा विकास आघाडीची सत्ता आहे. या सत्तेच्या जोरावर सातारा विकास आघाडीने कधी "नविआ'ची तर कधी भाजपची कोंडी वेळोवेळी केलेली आहे. राजकीय उलथापालथीत खासदार उदयनराजे भोसले आणि आमदार शिवेंद्रसिंहराजे भोसले यांनी राष्ट्रवादी कॉंग्रेसची साथ सोडून भाजपत प्रवेश केला. त्यांच्या या प्रवेशामुळे सातारा पालिकेवर अनौपचारिक भाजपचा झेंडा फडकला. पालिकेवर भाजपचा अनौपचारिक झेंडा असला तरी राज्यपातळीवरील कामकाजादरम्यान भाजपचे धोरण आणि सातारा पालिकेसह इतर स्थानिक स्वराज्य संस्थांमध्ये "साविआ' आणि "नविआ'ने आपले स्वतंत्र धोरण तसेच ठेवले आहे. 

गृहराज्यमंत्र्यांचे वक्तव्य दोन समाजात तेढ निर्माण करणारे, वंचितकडून राजीनाम्याची मागणी

दोन्ही नेते भाजपत आले असले तरी आवश्‍यक त्या प्रमाणात स्थान आणि संधी मिळत नसल्याची खंत सातारा पालिकेच्या सभागृहात असणाऱ्या भाजपच्या नगरसेवकांत होती. याविषयी मध्यंतरीच्या काळात निवेदनांचा पाऊसदेखील पडला. याच खदखदीतून सातारा पालिकेच्या कारभाराची चौकशी करण्याच्या मागणीसह भाजपच्या नगरसेवकांनी आंदोलनांचा बारसुध्दा उडवून दिला होता. भाजपच्या स्वीकृत नगरसेवकाने मुदत संपल्याने राजीनामा दिल्यानंतर स्वीकृत नगरसेवकाच्या हालचालींना वेग आला आहे. "साविआ'च्या वाट्याला आलेल्या दोनपैकी एका जागेवर ऍड. दत्ता बनकर हे कायम राहण्याची शक्‍यता आहे. उर्वरित एका जागेवर हद्दवाढीनंतर नव्याने पालिकेत आलेल्या भागाला संधी द्यायचे झाल्यास "साविआ'च्या नेत्यांची डोकेदुखी वाढणार आहे. 

अपयश लपवण्यासाठीच जनशक्तीचा आरोप; रोहिणी शिंदेंचा यादवांवर पलटवार

ही डोकेदुखी वाढू नये यासाठी "साविआ' जागा तुमची, उमेदवार आमचा असा फॉर्म्युला भाजपपुढे ठेवेल, अशी चर्चा पालिका कारभाऱ्यांच्यात होती. या चर्चेच्या पार्श्‍वभूमीवर भाजपच्या स्थानिक पदाधिकाऱ्यांशी संपर्क साधला असता, त्यांनी असा फॉर्म्युला मान्य नसल्याचे स्पष्ट करत वरिष्ठ पातळीवरून आदेश आल्यानंतर हालचाली करणार असल्याचे स्पष्ट केले. एकंदरच स्थानिक भाजप पदाधिकारी "साविआ'चा हात आपल्या हातात घेण्याच्या मानसिकतेत सध्यातरी नसल्याचे दिसून येत आहे. स्थानिक पदाधिकाऱ्यांनी स्वतंत्रपणाचा रेटा लावल्यास आणि त्यांच्या बाजूने राज्यपातळीवर नेतृत्वाने कौल दिल्यास आगामी काळात स्वीकृत नगरसेवक निवडीवेळी "साविआ'ची डोकेदुखी वाढण्याची शक्‍यता आहे.

संपादन : बाळकृष्ण मधाळे