उदयनराजे-शिवेंद्रराजे वादाची प्रदेशाध्यक्षांनी हवाच काढली; बावनकुळे म्हणाले, रस्त्यावरची भांडणं ही भाजपची..

सातारा : रस्त्यावरची भांडणं ही भाजपची (BJP) संस्कृती नव्हे. साताऱ्यात जे झालं ते योग्य नव्हतं, अशी टिप्पणी भाजपचे प्रदेशाध्यक्ष चंद्रशेखर बावनकुळे यांनी साताऱ्यातील दोन राजेंमध्ये झालेल्या वादावर बोलताना केली.

बावनकुळे (Chandrashekhar Bawankule) यांनी ‘सकाळ’च्या पुणे कार्यालयास सदिच्छा भेट दिली. त्यावेळी ‘सकाळ’च्या राज्यभरातील संपादकांशी त्यांनी व्हीसीद्वारे संवाद साधला.

ते म्हणाले, ‘‘खासदार उदयनराजे भोसले (Udayanraje Bhosale) आणि आमदार शिवेंद्रसिंहराजे भोसले (Shivendraraje Bhosale) यांच्यामध्ये झालेला वाद अयोग्य होता. रस्त्यावर येऊन वाद घालणं, ही भाजपची संस्कृती कधीही नव्हती आणि नसेल. खरेतर दोघांनी एकत्र बसून, चर्चा करून एखाद्या प्रश्‍नावर मार्ग काढायला हवा.

उपमुख्यमंत्री देवेंद्र फडणवीस (Devendra Fadnavis) यांनी दोघांना समजावून सांगितले आहे. मीही पुन्हा असा प्रकार होऊ नये म्हणून दोन्ही राजेंना विनंती करणार आहे. उदयनराजे हे केंद्रात तर शिवेंद्रसिंहराजे हे राज्यात आहेत, त्यामुळे त्यांच्यामध्ये वाद होणे अपेक्षित नाही. ’’