कास : दुर्गम खिरखिंडीतील तीन मुली रोज बोटीचे सारथ्य करत गावापासून कोसो दूर असलेल्या अंधारी गावात येऊन शिक्षण(complete education) पूर्ण करत आहेत. बोटीतून उतरून ती बोट शेंबडीतील दत्त मंदिरात लावून तेथून कास जवळच्या अंधारी गावात डोंगरकपारीतून, जंगली श्वापदांच्या मार्गातून चालत या सावित्रीच्या लेकी रोजच हे दिव्य पार करत आहेत.
खिरखंडी गावाचे नाव काढले तरी अंगावर काटा यावा, अशी परिस्थिती. दुर्गम बामणोली भागातील सह्याद्री व्याघ्र प्रकल्पाच्या क्षेत्रात कोयना नदीच्या पलीकडे वसलेले हे गाव. गावासाठी रस्ता ही गोष्टच अस्तित्वात नाही. त्यामुळे जगाशी संपर्क तोही फक्त बोटीतून. गावात पहिली ते पाचवीपर्यंत प्राथमिक शाळा. पूर्वी ती वस्तीशाळा होती. शासनाच्या वस्तीशाळा योजनेतून २००१ मध्ये गावच्या नशिबात शाळा आली.
शिक्षक शंकर भोसले यांनी कठोर मेहनत घेऊन शाळा नावारूपाला आणून शाळेला जिल्हा परिषद शाळेचा दर्जा मिळवून दिला. प्राथमिक शिक्षणाची सोय झाली, तरी सहावीनंतर काय, हा प्रश्न होताच. पुढील शिक्षण घ्यायचे, तर शिवसागर ओलांडावाच लागणार आणि मुलींनी हे शिवधनुष्य पेलले. अशा स्थितीतही या गावातील तीन मुली रोज बोटीचे सारथ्य करत गावापासून कोसो दूर असलेल्या अंधारी गावात येऊन शिक्षण पूर्ण करत आहेत. नुसती बोटीची कसरत असती एक वेळ परवडली असती पण बोटीतून उतरून ती बोट शेंबडीतील दत्त मंदिरात लावून तेथून कास जवळच्या अंधारी गावात डोंगरकपारीतून, जंगली श्वापदांच्या मार्गातून चालत येणे म्हणजे आगीतून उठून फुफाट्यात पडण्यासारखेच. पण, या सावित्रीच्या लेकी रोजच हे दिव्य पार करत आहेत.
शेंबडीतून अंधारीपर्यंत दऱ्याखोऱ्यातून चालत येणे व पुन्हा चालत जाणे, असा हा दिनक्रम. यात कधीही खंड पडत नाही. सकाळी सात वाजता घर सोडणाऱ्या मुली सायंकाळी उशिरा तिथून पुन्हा आपल्या घरी जातात. दिवसभर थकलेल्या असल्या तरी दुसऱ्या दिवशी त्याच उत्साहाने शाळेत येतात. माजी आमदार जी. जी. कदम प्रतिष्ठान संचलित अंधारी येथील ज्युनिअर कॉलेजमध्ये सारिका सपकाळ, पारू सपकाळ या बारावीत, तर प्रियांका सपकाळ ही अकरावी वाणिज्य शाखेत शिकत आहे. विनाअनुदानित तत्त्वावर चालणाऱ्या या कॉलेजमध्ये प्राचार्य गंगाराम पडगे, प्रा. विनायक पवार, प्रा. प्रियांका पडगे हे शिक्षक सेवा करत असून अशा दुर्गम भागात अनुदानित कॉलेजची गरज आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
