Khambatki Ghat : वाहतूक पोलिसांच्‍या नियोजनामुळे ‘खंबाटकी’त कोंडी टळली

खंडाळा - पाच दिवसांच्‍या गणपतीचे विसर्जन करून अनेकजण रविवारी वाहनातून पुण्याकडे निघाले होते. खंबाटकी घाटासह सातारा- पुणे महामार्गावर वाहनांची संख्‍या वाढली होती. तरीही महामार्ग वाहतूक पोलिसांच्या नियोजनामुळे या रविवारी मात्र सुदैवाने वाहतूक कोठेही खोळंबली नाही.

सातारा -पुणे महामार्गावर आज गाड्यांची संख्या खूपच जास्त आहे. महामार्गावर रांगेने वाहने जात होती. मात्र, ही वाहने आपल्या नेहमीच्या गतीने पुढे सरकत होती. केवळ आनेवाडी टोलनाक्यावर वाहनांची गर्दी असून, येथे वाहनांच्या रांगा लागल्या. मात्र, खंबाटकी बोगद्यात दोन लेन असूनही रस्त्यावरील गाड्या आपल्या वेगाने पुढे सरकत राहिल्‍या.

भुईंज महामार्ग वाहतूक पोलिस व सातारा पोलिस या महामार्गाच्या वाहतुकीवर लक्ष ठेऊन आहेत. गणपतीची सुटी संपल्यानंतर अनेक चाकरमानी रविवार असल्याने आज कोकण, कोल्हापूरहून पुणे व मुंबईच्या दिशेने निघालेले पाहायला मिळाले.