Maratha Reservation : प्रीतिसंगमावर यशवंतराव चव्हाणांना अभिवादन करुन जरांगे-पाटील साताऱ्याला रवाना

कराड : मराठा आरक्षणासाठी (Maratha Reservation) पश्चिम महाराष्ट्र व कोकणाच्या दौऱ्यावर असलेले मनोज जरांगे- पाटील यांनी कराड येथील यशवंतराव चव्हाण (Yashwantrao Chavan) यांच्या प्रीतिसंगमावरील समाधीला अभिवादन केले. त्यानंतर ते साताऱ्याकडे सभेला रवाना झाले.

मराठा समाजाला आरक्षण मिळावे, या मागणीसाठी मनोज जरांगे-पाटील (Manoj Jarange Patil) यांनी तिसऱ्या टप्प्यातील दौऱ्याला सुरुवात केली आहे. आज (शनिवार) सकाळी कराडच्या दत्ता चौकातील छत्रपती शिवाजी महाराज यांच्या पुतळ्यास अभिवादन करून ते ज्येष्ठ नेते यशवंतराव चव्हाण यांच्या समाधीस्थळी अभिवादनासाठी रवाना झाले.

यशवंतराव चव्हाण यांच्या समाधीस्थळी अभिवादन केल्यानंतर ते सर सेनापती हंबीरराव मोहिते यांच्या तळबीड येथील समाधीस अभिवादन करून राजधानी साताऱ्यास रवाना होणार आहेत. सातारा येथे राजवाडा नजिकच्या गांधी मैदानावर त्यांची सभा होणार आहे, त्यासाठी जयत तयारीही करण्यात आली आहे.