Balasaheb Patil : शरद पवारांची निवृत्ती धक्कादायक, त्यांनी निवृत्तीचा निर्णय..; काय म्हणाले आमदार पाटील?

कऱ्हाड : ज्येष्ठ नेते शरद पवार यांची आमदार बाळासाहेब पाटील (Balasaheb Patil) यांनी मुंबईत भेट घेतली. निवृत्तीचा निर्णय मागे घ्यावा, अशी विनंती जिल्ह्याच्या वतीने केली असल्याची माहिती आमदार पाटील यांनी दिली.

दरम्यान, आज (शुक्रवारी) पक्षाध्यक्षपदाबाबतच्या निर्णयासंदर्भात नेमलेल्या समितीच्या बैठकीस उपस्थित राहण्यासाठी आमदार पाटील हे आज मुंबईला (Mumbai) रवाना झाले. श्री. पवार (Sharad Pawar) यांनी राष्ट्रवादी काँग्रेस पक्षाच्या अध्यक्षपदावरून निवृत्ती घेण्याचा निर्णय जाहीर केला. या निर्णयानंतर पक्षात घडामोडी सुरू झाल्यानंतर मतदारसंघात असलेले आमदार पाटील त्याच दिवशी दुपारी तातडीने मुंबईला रवाना झाले.

बुधवारी त्यांनी शरद पवार यांची सिल्वर ओक निवासस्थानी भेट घेऊन त्यांच्याशी चर्चा केली. पवारांची निवृत्ती ही धक्कादायक असून, त्यांनी निवृत्तीचा निर्णय मागे घेऊन पक्षासाठी कार्यरत राहावे, अशी विनंती आमदार पाटील यांनी जिल्ह्याच्या वतीने केली. दरम्यान, मतदारसंघातील कामानिमित्त रात्री आमदार पाटील हे आज परत आले.

दरम्यान, अध्यक्षपदाच्या निर्णयासंदर्भात विचार करण्यासाठी पवारांनी सुचवलेल्या समितीची बैठक आज (शुक्रवारी) मुंबईत होत आहे. आज आमदार पाटील यांना मुंबई प्रदेश राष्ट्रवादी काँग्रेसच्या कार्यालयातून आज होत असलेल्या बैठकीस उपस्थित राहण्याबाबत निरोप देण्यात आला. त्यामुळे आमदार पाटील हे काल दुपारी पुन्हा मुंबईला रवाना झाले आहेत. आज ते मुंबई येथील पक्षाच्या समितीच्या बैठकीस उपस्थित राहणार आहेत.