'आर्थिक पिळवणूक करणाऱ्या अधिकाऱ्यांना कॉंग्रेस धडा शिकवेल'

वाई (जि. सातारा) ः वाई, खंडाळा, महाबळेश्वर तालुक्‍यांत काही शासकीय अधिकारी सर्वसामान्य जनतेची कामे न करता त्यांची पिळवणूक करीत असून या अधिकाऱ्यांना कॉंग्रेस पक्षाच्या माध्यमातून धडा शिकविण्यात येईल, असा इशारा सातारा जिल्हा युवक कॉंग्रेसचे अध्यक्ष विराज शिंदे यांनी पत्रकार परिषदेत दिला.
 
यावेळी तालुकाध्यक्ष कॉंग्रेसचे अध्यक्ष रवींद्र भिलारे, युवक कॉंग्रेसचे तालुकाध्यक्ष प्रमोद अनपट, ऍड. प्रतापराव देशमुख, अतुल संकपाळ, विशाल डेरे, विकास जाधव उपस्थित होते. काही शासकीय अधिकारी, बॅंका-पतसंस्थांचे अधिकारी सर्वसामान्य जनतेला वेठीस धरून नाहक त्रास देत असल्याच्या तक्रारी येत आहेत. लॉकडाउनमध्ये वाढलेल्या महागाईने सामान्य जनता त्रस्त झाली आहे. व्यवसाय- धंदे बंद असल्याने आणि रोजगार नसल्याने जनता मेटाकुटीला आली आहे. बॅंका, पतसंस्थांची कर्जे, सरकारी देणी, घरपट्टी, पाणीपट्टी, भरमसाट आलेली लाइट बिले अशा समस्यांचा सामना करताना सर्व जनता भरडून निघाली आहे. या बाबींचा विचार सरकारी अधिकाऱ्यांनी करावा, असे आवाहन श्री. शिंदे यांनी केले.

बहुतेक सरकारी कार्यालयांत लोकांची काही अधिकाऱ्यांकडून आर्थिक पिळवणूक चालू आहे. सर्वसामान्य लोकांची पैशाअभावी कामे होत नाहीत. हेलपाटे मारून जनता त्रस्त झाली आहे. या सरकारी अधिकाऱ्यांवर लोकप्रतिनिधींचा अंकुश नाही, असे नमूद करून श्री. शिंदे म्हणाले, ""कोरोनासारख्या भीषण संकटातही या अधिकाऱ्यांची मानसिकता बदललेली दिसत नाही. लोकप्रतिनिधी बघ्याची भूमिका घेत असतील तर कॉंग्रेसच्या वतीने तीव्र आंदोलन केले जाईल.'' कॉंग्रेस सत्तेत असला तरी सामान्य जनतेच्या हितासाठी भ्रष्ट लोकांना पाठीशी घालणार नाही. सामान्य जनतेला कोणी वाली राहिला नाही, अशा भ्रमात शासकीय अधिकाऱ्यांनी राहू नये. वीज वितरणच्या अधिकाऱ्यांनी वीज तोडू नये, बॅंका आणि पतसंस्थांनी थकीत कर्जदारांकडे वसुलीचा तगादा लावू नये, असे आवाहन करताना जनतेची आर्थिक पिळवणूक करणाऱ्यांना कॉंग्रेस धडा शिकवल्याशिवाय स्वस्थ बसणार नाही, असा इशाराही दिला.

Mahashivratri 2021 : श्री क्षेत्र महाबळेश्वर देवस्थान ट्रस्टने जाहीर केला महत्वपुर्ण निर्णय

Inspirationalwomenstories : भारताच्या राष्ट्रीय पक्षाची आई माहितीय?, ती करतेय आयुष्यभर मुक्याप्राण्यांचा सांभाळ

शरद पवारांशी पाऊण तासाच्या चर्चेनंतर उदयसिंह पडले बाहेर 

आठवले म्हणाले राज्याच्या मुख्यमंत्र्यांचा आदेश पाळला जात नाही, काेण पाळत नाही आदेश, वाचा सविस्तर 

Edited By : Siddharth Latkar