Elon Musk: इलॉन मस्क राजकारणात एंट्री करणार? पोल घेत म्हणाले...

Elon Musk Twitter poll: जगातील सर्वात श्रीमंत व्यक्तींपैकी एक असलेले इलॉन मस्क गेल्याकाही दिवसांपासून सातत्याने चर्चेत आहे. ट्विटरला खरेदी करण्यापासून ते कर्मचाऱ्यांना कामावरून काढण्यापर्यंत, ते आपल्या निर्णयाने अनेकांना धक्का देत आहेत. याशिवाय, मस्क आपल्या पोलमुळे देखील चर्चेत आहेत. आता त्यांनी राजकारणापासून लांब राहावे की नाही, याबाबत एक पोल घेतला आहे.

मस्क यांनी अमेरिकेतील राजकीय नेते Kevin McCarthy यांच्या समर्थनार्थ एक ट्विट केले होते. ट्विटरचा वापर राजकीय नेत्याच्या समर्थनार्थ केल्याने त्यांना टीकेला सामोरे जावे लागले होते. त्यानंतर आता त्यांनी एक पोल घेत राजकारणापासून लांब राहावे की स्वतःचे नुकसान करत राहावे, असा प्रश्न विचारत यूजर्सचे मत मागितले आहे. याबाबत बहुतांश यूजर्सने दुसऱ्या पर्यायाच्या बाजूने मत देत मस्क यांनी स्वतःच स्वतःचे नुकसान करून घ्यावे, असे म्हटले आहे.

हेही वाचा: Twitter: मस्क आल्यापासून ट्विटरला लागलं ग्रहण, 20 कोटी यूजर्सचा डेटा लीक; तुमचे अकाउंट असेल तर सावधान

याशिवाय, मस्क यांनी स्वतःचे २०१३ चे एक ट्विट देखील पुन्हा शेअर केले आहे. या ट्विटमध्ये त्यांनी राजकीय गोष्टींवर भाष्य करणार नसल्याचे म्हटले होते. मात्र, हे ट्विट पुन्हा शेअर करत काही सवयी मोडणे कठीण असल्याचे म्हटले आहे.

मस्क यांनी उघडपणे रिपब्लिकन नेते केव्हिन मॅकार्थी यांचे समर्थन केल्याने आश्चर्य व्यक्त केले जात आहे. केव्हिन हे यूएस हाउस स्पीकरच्या पदासाठी निवडणूक लढवत आहेत.

काही दिवसांपूर्वीच घेतला होता आणखी एक पोल

मस्क यांनी काही दिवसांपूर्वीच ट्विटरचे सीईओपद सोडावे की नाही, यासंदर्भात पोल घेतला होता. या पोलवर बहुतांश यूजर्सने मस्क यांनी पद सोडावे, या बाजूने मत दिले होते. मात्र, या पोलनंतर देखील मस्क हे आपल्या पदावर कायम आहेत.

हेही वाचा: द मिसिंग टाइल सिंड्रोम ठेवा आपल्यापासून दूर