Shravani Tourism : एसटी महामंडळाकडून महिलांसाठी खास ऑफर; आता सहलीसाठी सवलतीच्या दरात मिळणार 'लालपरी'

कऱ्हाड : श्रावण महिन्यात महिला व नागरिक मोठ्या संख्येने देवदर्शनासाठी जातात. एसटी प्रशासनाच्या वतीने खास श्रावणी सहलीसाठी (Shravani Sahal) बस उपलब्ध करून देण्यात येत आहेत.

त्याअंतर्गत कऱ्हाड तालुक्यातील महिलांसाठी या श्रावण सहलीसाठी एसटीने सवलतीच्या दरात महिलांसाठी बस उपलब्ध केल्या आहेत. त्याचा महिलांना लाभ घ्यावा, असे आवाहन येथील एसटी आगार प्रमुख शर्मिष्ठा पोळ यांनी केले आहे.

भाविक विशेषतः महिला या श्रावण महिन्यात देवदर्शनासाठी मोठ्या प्रमाणात जातात. त्याचा विचार करून एसटी महामंडळाने महिलांच्या श्रावण सहलीसाठी सवलतीच्या दरात एसटी बस उपलब्ध करून देण्याची कार्यवाही सुरू केली आहे. शनिवार व रविवार शालेय वाहतूक कमी असल्याने या दिवशी श्रावणी सहलीसाठी बस उपलब्ध करून देण्यास प्राधान्य देण्यात आले आहे.

नुकतेच तालुक्यातील घारेवाडीच्या महिलांनी शासनाच्या सवलतीच्या दरात श्रावणी सहलीचा आनंद लुटला. गावातील ४६ महिला या सहलीत सहभागी झाल्या होत्या. घारेवाडीतील उमेद अभियानांतर्गत धुळेश्वर महिला ग्रामसंघ स्त्री सक्षमीकरणासाठी कार्यरत आहे. या संघाच्या माध्यमातून महिलांची श्रावणी सहल काढण्यात आली.

त्याचबरोबर मसूर, चचेगाव, कऱ्हाड, बनवडी अन्य दहा गावांतील महिलांनी अष्टविनायक, प्रतापगड, महाबळेश्वर, पाचगणी, पंढरपूर व अन्य धार्मिक ठिकाणच्या श्रावणी सहलीचा आनंद लुटला आहे. कऱ्हाड तालुक्यातील महिलांनीही एसटीच्या सवलतीच्या दरातील बस सेवेचा लाभ घ्यावा, असे आवाहन आगार प्रमुख श्रीमती पोळ यांनी केले आहे.