Viral Video : 17 लाखाची नवी कार पडली बंद; गाढवाने ओढत मालकाने आणली शोरूमपर्यंत

उदयपूर : राजस्थानातील उदयपूर येथे एका व्यक्तीने चक्क गाढवाने ओढत महागडी कार शोरूमपर्यंत आणल्याची घटना घडली आहे. हा व्हिडिओ सोशल मीडियावर चांगलाच व्हायरल झाला असून ती गाडी बिघडली असून शोरूमकडून योग्य प्रतिसाद मिळत नसल्याचं मालकाकडून सांगण्यात येत आहे.

प्रत्येकजण घर, गाडी यासारख्या वस्तू मोठ्या इच्छेने खरेदी करतो. राजस्थानमधील राज कुमार गायरी नावाच्या एका व्यक्तीनेही मोठ्या महत्त्वाकांक्षेने तब्बल १७ लाखांची ह्युंडाई कंपनीची कार खरेदी केली. पण त्याने खरेदी केलेली नवीन कार वारंवार बंद पडत होती. कंपनी सुद्धा योग्य सर्व्हिस देत नव्हती.

त्यामुळे कंपनीवर आपला राग काढण्यासाठी त्या व्यक्तीने एक अनोखा मार्ग शोधला. सदर व्यक्तीने त्यानंतर ही कार गाढवाने ओढत शोरूमपर्यंत नेली आहे. या घटनेचा व्हिडिओ सध्या व्हायरल होत आहे.

दरम्यान, मागच्या काही दिवसांपासून गाडीच्या बॅटरीचा प्रोब्लेम येत होता. पण शोरूमकडून आम्हाला योग्य प्रतिसाद मिळाला नाही. त्यामुळे आम्ही थेट गाढवाला बांधून गाडी शोरूमपर्यंत नेण्याचं ठरवलं असं गाडी मालकाने सांगितलं आहे.