Guinness World Records ची अधिकृत घोषणा, आठवड्यातला सगळ्यात वाईट Day ठरला 'Monday'

आठवड्याचे सहा दिवस काम केल्यानंतर निवांत सगळा थकवा बाजूला सारत आनंदाने एन्जॉय करण्याचा दिवस म्हणजे संडे. मात्र संडे संपताच जेव्हा मंडेचा सूर्य उगवतो तेव्हा अनेकांना सोमवार का येतो असेच वाटते. कदाचित तुम्हीही त्यातलेच एक असाल. हेच कारण आहे की अनेकजण सोमवार दिवसाचा तिरस्कार करतात. मात्र आता गिनिज बुक रेकॉर्डनेही आता या दिवसाची नोंद आठवड्यातील सगळ्यात वाईट दिवस म्हणून केली आहे.

गिनीज वर्ल्ड रेकॉर्ड्सने सोमवारी त्यांच्या अधिकृत ट्विटर हँडलवरून एक पोस्ट शेअर केली. GWR ने आठवड्याचा सर्वात वाईट दिवसा म्हणून सोमवार या दिवसाची नोंद केली. ही पोस्ट सोशल मीडियावर शेअर होताच सोशल मीडियावर प्रचंड व्हायरल झाली. "आम्ही अधिकृतपणे सोमवारला आठवड्यातील सर्वात वाईट दिवसाचा रेकॉर्ड देत आहोत," असे या पोस्टमध्ये लिहीले आहे.

आठवड्यातील सुट्टीचा आनंदाचा एक दिवस मिळतो आणि परत सोमवारचा सूर्य उगवतो. तेव्हा हा दिवसच लोकांना नकोसा वाटतो. अशांना ही पोस्ट वाचून तर गगनात मावेनासा आनंद झाला असेल. त्यामुळे गिनिज वर्ल्ड रेकॉर्डच्या अधिकृत सोशल मीडियावर ही पोस्ट शेअर होताच भन्नाट व्हायरल झाली. अनेकांनी यावर प्रतिक्रियाही दिल्या आहेत.