Budget 2023 : अर्थमंत्र्यांनी 90 मिनिटांच्या भाषणात 'या' शब्दांचा केला सर्वाधिक उल्लेख

Union Budget 2023 : अर्थमंत्री निर्मला सीतारामन यांनी बुधवारी लोकसभेत वर्ष 2023-24 चा सर्वसाधारण अर्थसंकल्प सादर केला आणि त्याचे वर्णन अमृतकाळाचे पहिले बजेट असा केला.

पाचव्या केंद्रीय अर्थसंकल्पात निर्मला सीतारामन यांनी महिला आणि ज्येष्ठ नागरिकांना मोठी भेट दिली आहे. याशिवाय, त्यांनी टॅक्स स्लॅबमधील बदलाबाबत एक मोठी घोषणा केली.

त्यानंतर वार्षिक 7 लाख रुपयांपर्यंत कमाई करणाऱ्यांना कोणताही कर भरावा लागणार नाही. निर्मला सीतारामन यांनी प्राप्तिकरात सवलत देणार्‍या 90 मिनिटांच्या भाषणात 81 वेळा कर (Tax) , तर उत्पन्न (Income) हा शब्द 58 वेळा वापरला.

निर्मला सीतारामन यांनी कोणत्या शब्दांचा सर्वाधिक उल्लेख केला?

अर्थमंत्री निर्मला सीतारामन यांनी त्यांच्या 90 मिनिटांच्या अर्थसंकल्पीय भाषणात सर्वात जास्त प्रस्ताव (Proposed) या शब्दाचा उल्लेख 89 वेळा केला. याशिवाय अर्थमंत्र्यांनी टक्केवारीचा (Per Cent) 79 वेळा, कर (Tax) 81 वेळा आणि उत्पन्नाचा (Income) 58 वेळा उल्लेख केला आहे.

निर्मला सीतारामन यांनी त्यांच्या भाषणात लाख कोटी 19 वेळा, कस्टम ड्युटी (Custom Duty) 15 वेळा आणि आयकर (Income Tax) हा शब्द 14 वेळा वापरला.

आयकर संदर्भात अर्थमंत्र्यांनी मोठी घोषणा केली :

अर्थमंत्री निर्मला सीतारामन यांनी नवीन कर स्लॅब जाहीर केले, ज्या अंतर्गत नवीन प्राप्तिकर प्रणाली अंतर्गत वार्षिक 7 लाख रुपयांपर्यंतच्या उत्पन्नावर कोणताही कर भरावा लागणार नाही.

त्या म्हणाल्या, 'सध्या 5 लाख रुपयांपर्यंतच्या उत्पन्नावर कर लागत नाही. मी नवीन कर प्रणालीमध्ये कर सूट मर्यादा 7 लाख रुपये करण्याचा प्रस्ताव ठेवला आहे.

नवीन कर प्रणाली डीफॉल्ट कर प्रणाली बनवण्यात आली आहे. 2020 मध्ये लागू करण्यात आलेले 6 आयकर स्लॅब बदलून 5 करण्यात आले. आयकर मूळ सूट 3 लाख रुपये असेल. आता नवीन कर प्रणालीमध्ये स्टँडर्ड डिडक्शनचा लाभ मिळणार आहे.