पर्यावरणपूरक शाश्‍वत विकासाला हवे प्राधान्य! 

सकाळ वृत्तसेवा 
Friday, 14 February 2020

गोदावरी नदी स्वच्छ झाल्याशिवाय स्मार्ट शहर होऊ शकत नाही. नदीमध्ये सोडण्यात येणारे सांडपाणी वेगळे करावे व त्यावर प्रक्रिया करण्यात यावी. नाशिक शहर स्मार्ट बनविताना शहरामधून वाहणाऱ्या गोदावरी नदीच्या पर्यावरणाचे संरक्षण करणे आवश्‍यक आहे

नाशिक : नाशिकला स्मार्ट शहर बनविण्यासाठी सर्व पायाभूत सुविधांयुक्त स्वच्छ, पर्यावरणपूरक, आधुनिक तंत्रज्ञानाने नियंत्रित शाश्‍वत विकासाला प्राधान्य द्यावे. तसेच शहरातून वाहणाऱ्या गोदावरी नदीला स्वच्छ व सुंदर करण्यात यावे, असे निर्देश पालकमंत्री छगन भुजबळ यांनी दिले. 

पर्यावरणपूरक शाश्‍वत विकासाला हवे प्राधान्य 

मंत्रालयात नाशिक महापालिकेचे आयुक्त राधाकृष्ण गमे यांनी गुरुवारी (ता. 13) नाशिक स्मार्टसिटी प्रकल्पाचे सादरीकरण केले. सामान्य प्रशासन विभागाचे अपर मुख्य सचिव तथा स्मार्टसिटीचे अध्यक्ष सीताराम कुंटे, स्मार्टसिटीचे मुख्य कार्यकारी अधिकारी प्रकाश थविल उपस्थित होते. या वेळी श्री. भुजबळ म्हणाले, की नाशिक शहराला समृद्ध सांस्कृतिक वारसा लाभला आहे. जुने गावठाण ही नाशिकची खरी ओळख आहे. त्यामुळे नाशिककरांच्या मागणीनुसार जुन्या क्षेत्राच्या विकासासाठी 598 एकरांतील जुन्या गावठाणाची निवड करण्यात आली. स्काडा प्रणालीच्या सहाय्याने 24 तास पुरेशा दाबाने व शुद्ध पाणीपुरवठा जुन्या गावठाणामध्ये करण्यात येणार आहे. स्वयंचलित पद्धतीने पुरेसा दाब, विविध ठिकाणी शुद्ध पाण्याची तपासणी, पाणीपुरवठा नलिकांमध्ये "लिकेज डिटेक्‍शन' स्वयंचलित पद्धतीने होणार आहे. त्यामुळे नागरिकांना पाणी साठवणुकीसाठी टाक्‍या बांधण्याचा खर्च, वॉटर फिल्टर उपकरणांवरील खर्च तसेच पाणी साठवणुकीच्या प्रवृत्तीमुळे होणारा पाण्याचा अपव्यय या गोष्टी टाळणे शक्‍य होणार आहे. त्यातून पाण्याची बचत होऊन सद्यःस्थितीतील 43 टक्‍क्‍यांवरील "नॉन रेव्हेन्यू वॉटर' दहा टक्‍क्‍यांच्या आत आणणे शक्‍य होईल. स्वयंचलित प्रणालीमुळे कोठेही बिघाड झाल्याची माहिती आपोआप नियंत्रण कक्षात समजून ती दुरुस्ती तत्काळ करता येईल. 

हेही वाचा > अक्षरशः चक्काचूर! अखेर 'असा' झाला मैत्रीचा दुर्देैवी अंत..

गोदावरी नदीच्या पर्यावरणाचे संरक्षण करणे आवश्‍यक
गोदावरी नदी स्वच्छ झाल्याशिवाय स्मार्ट शहर होऊ शकत नाही. नदीमध्ये सोडण्यात येणारे सांडपाणी वेगळे करावे व त्यावर प्रक्रिया करण्यात यावी. नाशिक शहर स्मार्ट बनविताना शहरामधून वाहणाऱ्या गोदावरी नदीच्या पर्यावरणाचे संरक्षण करणे आवश्‍यक आहे. -छगन भुजबळ, पालकमंत्री 

हेही वाचा > गर्भपाताच्या गोळ्या देऊन प्रियकराने चक्क 'तिचा' गर्भपातही केला...त्यानंतर...


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Chhagan Bhujbal on Nashik Smart city and godavari river Nashik Marathi News