पोषक वातावरणाने बळावल्या द्राक्ष निर्यातदारांच्या आशा 

लखमापूर (जि.नाशिक) : दिंडोरी तालुक्यातील द्राक्षपंढरीमध्ये सध्या वातावरण द्राक्षपिकांसाठी पोषक तयार झाल्याने द्राक्ष उत्पादक व निर्यातदारांच्या चालू हंगामावरील आशा बळावल्या आहेत. मागील द्राक्ष हंगामात कोरोनाच्या परिस्थितीमुळे दिंडोरी तालुक्यातील शेतकरी वर्गाला मोठ्या प्रमाणावर आर्थिक समस्येला तोंड द्यावे लागले होते; परंतु यंदाच्या हंगामात द्राक्षपिकासाठी वातावरण पोषक तयार झाल्याने चालू हंगामात मागील हंगामात गेलेले भांडवल व नुकसान भरून निघेल, अशी अपेक्षा बळीराजाला वाटू लागली आहे. 

यंदा मोठ्या प्रमाणात द्राक्षे निर्यातीचे चित्र

जिल्ह्यातील काही भागांमध्ये हंगामातील द्राक्षे काढणीला सुरवात झाली असून, जागेवर ८० ते ८५ रुपये प्रतिकिलो भाव मिळत आहे. तसेच निर्यातक्षम द्राक्षांचे भाव त्यापेक्षा अधिक आहेत. मागील हंगामात द्राक्षे बऱ्यापैकी निर्यात करण्यात आली. प्राथमिक अंदाजपत्रकाच्या आधारानुसार निर्यातीची आकडेवारी जवळजवळ एक लाख ९५ हजारांपर्यंत मिळते. सध्याचे वातावरण निर्यातीसाठी पोषक असून, बाहेरील देशात द्राक्षे योग्य वेळेत अथवा कसली अडचण न येता झाल्यास मागील वर्षीच्या तुलनेत यंदा मोठ्या प्रमाणात द्राक्षे निर्यातीचे चित्र निर्माण होईल, अशी अपेक्षा शेतकरी व निर्यातदारांना वाटू लागली आहे. 

शेतकरी व निर्यातदारांना अपेक्षा
मागील द्राक्ष हंगामात साधारणपणे फेब्रुवारी ते एप्रिल या काळात कोरोनामुळे जागतिक टाळेबंदीची घोषणा केल्यामुळे द्राक्ष हंगामाची पूर्णपणे वाट लागली होती. त्यामुळे दिंडोरीच्या द्राक्षपंढरीतील बळीराजा मेटाकुटीला आला होता. अशा खडतर परिस्थितीस शेतकरी वर्गाला तोंड द्यावे लागले. त्यामध्ये एवढा माल शिल्लक राहिला की बेदाणा निर्मितीसाठीसुद्धा कोणी खरेदी करीत नव्हते. परंतु यंदा मात्र द्राक्ष पिकांसाठीचे वातावरण चांगल्या स्वरूपाचे असल्याने यंदा द्राक्षाची निर्यात चांगली होईल, अशी अपेक्षा शेतकरी व निर्यातदारांना वाटू लागली आहे. 

हेही वाचा- अखेर बेपत्ता शेतमजूराचा शोध लागला; पण धक्कादायक दृश्याने गावात खळबळ

मागील हंगामातील जानेवारी २०२० पर्यंतची द्राक्षे निर्यात आकडेवारी : 
- नेदरलँड : २३८ (कंटेनर) ३ हजार १६० (टन) 
- जर्मनी : ६४ (कंटेनर) ८३० (टन) 
- यूके : ३० (कंटेनर) ३९२ (टन) 
- डेन्मार्क : ६ (कंटेनर) ७४ (टन) 
- फिनलँड : ४ (कंटेनर) ५० (टन) 
- लिथुनिया : ३ (कंटेनर) ४७ (टन) 
- स्पेन : २ (कंटेनर), २४ (टन) 
- फ्रान्स : १ (कंटेनर), १४(टन) 
- इटली : १ (कंटेनर), १३(टन) 
- सोलवेनिया : ७ (कंटेनर), ९३ (टन) 

हेही वाचा - संशयास्पद दिसणाऱ्या बुलेटच्या सीटखालून मिळाल्या धक्कादायक गोष्टी; पोलीसांच्या तपासणीत खुलासा