नाशिक : राज्याचे विरोधी पक्षनेते देवेंद्र फडणवीस बुधवारी (ता. १३) नाशिक दौऱ्यावर येत असून, त्यांच्या उपस्थितीत विविध कार्यक्रम होणार आहेत. वसंत गिते व सुनील बागूल यांनी भाजपला केलेला रामराम व माजी आमदार बाळासाहेब सानप यांचे पक्षात पुर्नगामनाच्या पार्श्‍वभूमीवर फडणवीस यांचा दौरा महत्त्वाचा ठरणार आहे.
भव्य स्वागताची तयारी
फडणवीस यांचे दुपारी शहरात आगमन होईल. भाजपतर्फे पाथर्डी फाटा येथे ढोलताशांच्या गजरात भव्य स्वागत केले जाणार आहे. फडणवीस यांच्या हस्ते बुधवारी दुपारी दोनला माजी संघटनमंत्री नाना नवले यांच्या जीवनावरील पुस्तकाचे प्रकाशन होईल. दुपारी साडेतीनला पत्रकार संघाच्या पुरस्काराचे वितरण, तर सांयकाळी साडेपाचला देशस्थ ऋग्वेदी संस्थेच्या नूतन वास्तूचा उद्‌घाटन होणार आहे.
दौऱ्याच्या नियोजनसांदर्भात भाजपच्या ‘वसंत स्मृती' कार्यालयात बैठक झाली. महापौर सतीश कुलकर्णी, प्रदेश उपाध्यक्ष बाळासाहेब सानप, शहर संघटन सरचिटणीस प्रशांत जाधव, आमदार राहुल ढिकले, प्रदीप पेशकार, महापालिका सभागृह नेते सतीश सोनवणे, सुहास फरांदे, पवन भगूरकर, सुनील केदार, स्वाती भामरे, आध्यत्मिक आघाडी प्रदेश संयोजक तुषार भोसले, पंचवटी प्रभाग सभापती शीतल माळोदे, कोमल मेहरोलिया, ॲड. श्याम बडोदे आदी उपस्थित होते.
फडणवीस काय बोलणार?
सानप यांचा भाजपमध्ये पुर्नप्रवेश झाल्यानंतर पक्षाची ताकद वाढल्याचे बोलले जात असतानाच, शिवसेनेने वसंत गिते व सुनील बागूल यांना शिवसेनेत प्रवेश देऊन परतफेड केली आहे. श्री. गिते यांचे पुत्र प्रथमेश पहिल्याच टर्ममध्ये उपमहापौर होते, तर सुनील बागूल यांच्या मातोश्री भिकुबाई बागूल विद्यमान उपमहापौर आहेत. या पार्श्‍वभूमीवर गिते व बागूल यांनी प्रवेश केल्याने फडणवीस काय बोलतात, याकडे लक्ष लागले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.