दुर्देवी! धरणात पोहण्यासाठी गेलेल्या पोलीसासह दोन मित्रांचा बुडून मृत्यू...परिसरात खळबळ

नाशिक : (सिडको) सुट्टीची मज्जा घेण्यासाठी चार मित्रांची धरणाकडे धाव...पोहण्याचा मोह न आवरणं हीच मोठी ठरली चूक...तिघांनी घेतला मस्त पाण्यात पोहण्याचा आनंद. गणेशला पाण्याची भीती म्हणून तिघा मित्रांनी त्याला हिणवलं देखील...पण काय माहित होतं काळ तिथंच होता दगा धरुन अन् तेवढ्यात 

धक्कादायक घटना...

वालदेवी धरणावर पोहोण्यासाठी गेलेल्या सिडकोतील तीन युवकांचा पाण्यात बुडून मृत्यू झाल्याची धक्कादायक घटना घडली आहे. या घटनेनंतर सिडको परिसरात हळहळ व्यक्त करण्यात येत असून यात एका पोलिस कर्मचाऱ्याचाही समावेश आहे. वैभव पवार (वय २७ रा. श्रीराम मंदिर चौक, उत्तमनगर), महेश लाळगे (वय ३० रा. पवन नगर), महेश बागुल (वय ३५ रा. पाथर्डीफाटा) अशी या मृत युवकांची नावे आहेत. या घटनेची नोंद वाडीवऱ्हे पोलिसांत झाली आहे. 

असा आहे प्रकार

वैभव पवार, महेश लाळगे आणि महेश बागुल हे शनिवारी (ता.18) दुपारी वालदेवी धरणावर गेले होते. तिघेही पोहण्यासाठी पाण्यात उतरले परंतु तिघांना पाण्याचा अंदाज आला नसल्याने एकमेकांना वाचवताना पाण्यात बुडून मृत्यू झाला. ही घटना शनिवारी दुपारी साडेतीन - चार वाजेच्या सुमारास घडली. या घटनेत त्यांचा चौथा मित्र गणेश जाधव (वय २९) हा पाण्यात उतरला नसल्याने वाचला. मयत पवार हा पुणे येथे एम.ई.चे शिक्षण घेत होता तर मयत बागुल हा मुंबई येथे पोलिस दलात आहे. पुढील तपास पोलीस निरीक्षक विश्वजीत जाधव यांच्या मार्गदर्शनाखाली सुरू आहे. या तिघांचेही मृतदेह शवविच्छेदनासाठी जिल्हा शासकीय रुग्णालयात पाठविण्यात आले आहे. घटनेनंतर सिडको परिसरात हळहळ व्यकत करण्यात येत आहे.

हेही वाचा > अखेर जिल्ह्यात 'हा' पर्याय वापरुन भातांच्या रोपांची लागवड...वाचा सविस्तर बातमी

हेही वाचा > धक्कादायक! खासगी रुग्णालयांकडून कोविड उपचारात अनियमितता... कारवाईची शक्यता