''साहेब, आम्हाला महाराष्ट्रात परत आणा!''...'त्यांची' पालकमंत्र्यांना भावनिक साद

नाशिक : (मनमाड) रेल्वेच्या प्रशिक्षणार्थी ऍप्रेंडेन्सशिपसाठी तमिळनाडू, कर्नाटक राज्यात गेलेले महाराष्ट्रातील तब्बल 382 प्रशिक्षणार्थी लॉकडाउनमुळे तिथेच अडकले आहेत. अडकून पडल्याने या सर्वांची मोठी गैरसोय होत आहे. संबंधित प्रशिक्षणार्थी घरी येण्यासाठी तेथील प्रशासनाकडे पाठपुरावा करीत असून, त्यांना त्यांच्याकडून केवळ आश्‍वासने मिळत असल्याने विद्यार्थी भयभीत झाले आहेत. अखेर घरी परतण्याकरिता नाशिक जिल्ह्यासह इतर जिल्ह्यातील मुलांनी राज्य शासनासह पालकमंत्री छगन भुजबळ यांना "आम्हाला घरी यायचे आहे', अशी भावनिक साद घातली आहे. 

प्रशासनाकडून केवळ आश्‍वासनेच

रेल्वेच्या ऍप्रेंडेन्सशिपसाठी प्रशिक्षणार्थी म्हणून तमिळनाडूच्या मेहुपालियम शहरात 165, तर इरोड शहरात 167, तर कर्नाटक राज्यातील मॅग्लोर शहरात 50 प्रशिक्षणार्थी अडकून पडले आहेत. लॉकडाउन सुरू झाल्यावर त्यांची ऍप्रेंडेन्सशिप संपली. मात्र देशात संचारबंदी असल्याने या सर्वांची गैरसोय होत आहे. कोरोनाच्या भीतीमुळे आणि वाहतुकीची कुठलीच व्यवस्था नसल्याने या प्रशिक्षणार्थींच्या पालकांची चिंता अधिकच वाढली आहे. घरी परत येण्याकरिता या सर्वांनी मोबाईलवर आलेले ऑनलाइन फॉर्म भरले आहेत. मात्र अद्याप कुठलीच कारवाई त्यावर झालेली नाही. या वेळी येथे इतर राज्यांतून आलेल्या प्रशिक्षणार्थींना त्यांच्या राज्य शासनाने गाड्यांमधून त्यांच्या राज्यात नेले आहे. आम्ही महाराष्ट्रातील सर्व प्रशिक्षणार्थी एकाकी पडलो असल्याचे या वेळी तिथे अडकलेल्या सर्वांनी सांगत घरी परतण्याकरिता मुख्यमंत्री उद्धव ठाकरे, नाशिक जिल्ह्याचे पालकमंत्री छगन भुजबळ यांना भावनिक साद घातली आहे. येथील प्रशासनाकडे याबाबत पाठपुरावा सुरू असून, केवळ आश्‍वासनेच मिळत असल्याचे एकाने सांगितले. 

प्रशिक्षणार्थी संख्या 

मेहुपालियम शहर (तमिळनाडू)
 
नाशिक (33), जळगाव (81), बुलढाणा (7), 
नागपूर (1), कोल्हापूर (1), सोलापूर (1), 
अमरावती (6), अकोला (10), बीड (3), 
चंद्रपूर (8), नांदेड (6), गोंदिया (1), वर्धा (1), 
वाशीम (1), भंडारा (5) 

हेही वाचा > कृषीमंत्र्यांची प्रार्थना अन् मौनव्रताला मारूतीराया पावणार का? मंदिरात तब्बल तीन तास ठिय्या

इरोड शहर (तमिळनाडू) 

नाशिक (21) जळगाव (93), बुलढाणा (7), 
नागपूर (2), कोल्हापूर (1), सोलापूर (1), 
अमरावती (6), अकोला (10), बीड (2), 
चंद्रपूर (8), नांदेड (6), गोंदिया (1), 
वर्धा (1), वाशीम (1), भंडारा (7) 

मंगळुरू (कर्नाटक)

नाशिक (15), जळगाव (35)  

हेही वाचा > 'पूरा जिस्म खोखला बनानेवाली रोजीरोटी'...नरकयातनाच झेलताय 'इथं' गल्ली-बोळातील लाखो जीव!

लॉकडाउन जाहीर झाल्यापासून म्हणजे दोन महिने होत आले, मी तमिळनाडूमध्ये अडकलो आहे. प्रशासनाने तत्काळ विचार करून आमची सोडवणूक करावी. आमचे कुटुंब काळजीत आहे. आमची सहनशक्ती संपत आहे. नाशिक जिल्ह्याचे पालकमंत्री छगन भुजबळसाहेब यांना विनंती आहे, की आम्हाला घरी यायचे आहे. - पवन निरभवणे (प्रशिक्षणार्थी, मनमाड) 

हेही वाचा > थरारक! सिग्नलवर पोलीसांनी हटकले अन् बस्स..तिथेच उभा होता 'त्याचा' 'काळ'