Nandurbar News : नवापूर तालुक्यातील केळी ग्रामपंचायतींतर्गत चालू पंचवार्षिक निवडणुकीत ग्रामपंचायत सदस्य म्हणून निवडून आलेले नीलेश पारत्या गावित, जोशदा सवलत गावित, सुंगती जितेंद्र वसावे यांनी शासकीय जमिनीवर अतिक्रमण केल्याप्रकरणी जिल्हाधिकारी मनीषा खत्री व नाशिक अपर आयुक्त यांनी अपात्र घोषित करण्याची कारवाई केली आहे. या कारवाईमुळे केळी ग्रामपंचायतींतर्गत खळबळ उडाली आहे. (3 members of Keli Gram Panchayat declared ineligible nandurbar news)
महाराष्ट्र ग्रामपंचायत अधिनियम १९५८ चे कलम १४ (ज) ३ प्रमाणे विवाद अर्ज दिलवरसिंग नाग्या गावित, मगन वश्या गावित, नरेंद्र गोरजी गावित, विष्णू संपत गावित, रमेश छगन वसावे, प्रवीण ठाकरे गावित (सर्व रा. केळी, ता. नवापूर) यांनी प्रतिवादी ग्रामपंचायत सदस्य नीलेश पारत्या गावित, जोशदा सवलत गावित, सुंगती जितेंद्र वसावे यांच्याविरोधात शासकीय जमिनीवर अतिक्रमण केल्याप्रकरणी सदस्यत्व रद्द करण्याची मागणी करत अर्ज दाखल केला होता.
यावर ग्रामपंचायत विभागांतर्गत जिल्हाधिकाऱ्यांनी २९ जुलै २०२२ ला सदस्यांना अपात्र घोषित करत निकाल जाहीर केला होता. अपात्र घोषित झालेल्या सदस्यांनी नाशिक अपर आयुक्तांकडे अपील अर्ज दाखल केला होता; परंतु २९ मार्च २०२३ च्या सुनावणीदरम्यान नंदुरबार जिल्हाधिकाऱ्यांनी अपात्र ठरविलेल्या सदस्यांचा अपील अर्ज फेटाळत महाराष्ट्र ग्रामपंचायत अधिनियम १९५८ चे कलम १६ निकालाच्या सूचनापत्रानुसार अपील अमान्य करत तिन्ही सदस्यांचे पद अपात्र घोषित करण्यात आले आहे.
हेही वाचा : संतुलित आहारातून रोखा फॅटी लिव्हरचा आजार
पुन्हा निवडणूक?
शासकीय जमिनीवर अतिक्रमण करून निवडणूक लढवून सदस्यत्व प्राप्त केलेल्या केळी ग्रामपंचायतीमधील नीलेश पारत्या गावित, जोशदा सवलत गावित, सुंगती जितेंद्र वसावे या सदस्यांचे पद अपात्र घोषित केल्याने एकच खळबळ उडाली आहे. यातील एकजण उपसरपंचपदावर होता.
अपात्र झालेल्या सदस्यांचे पॅनल मोडकळीस आल्याने सरपंचपदही धोक्यात आले आहे. आता प्रशासनातर्फे केळी ग्रामपंचायतींतर्गत पुन्हा निवडणुका घेऊन अपात्र सदस्यांच्या जागी नवीन सदस्य निवडण्याची प्रक्रिया पुढील शासकीय सूचनेप्रमाणे राबविण्यात येणार आहे..
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.