Dhule Fire Accident News: पाचकंदील परिसरात कापडाचे दुकान खाक; लाखांचे नुकसान, शेजारच्या दुकानांना झळ

धुळे : शहरातील पाच कंदील परिसरामध्ये कापड दुकानाला रविवारी (ता.२४) मध्यरात्री भीषण आग लागली. त्यात दुकान जळून खाक झाले.

दुकान मालकाचे लाखांचे नुकसान झाले असून या आगीची झळ शेजारील दुकानांना देखील बसली आहे. (Cloth shop gutted in Pachkandil area Loss of lakhs damage to neighboring shops Dhule Fire Accident News)

शहरातील मुख्य बाजारपेठ असलेल्या जुन्या आग्रा रोडवर पाचकंदील परिसरात रामेश्‍वर गोपीराम गुळवाले (अग्रवाल) यांचे कापड दुकान आहे. या दुकानाला मध्यरात्री आग लागली. स्थानिक नागरिकांनी आगीची घटना तत्काळ मनपाच्या अग्निशमन विभागाला कळविले.

तोपर्यंत आग संपूर्ण दुकानामध्ये पसरली. माहिती मिळताच दोन बंब घटनास्थळी दाखल झाले. अर्धा ते पाऊण तास शर्थीच्या प्रयत्नानंतर अग्निशमन दलाच्या जवानांना आगीवर नियंत्रण मिळवण्यात यश आले.

दुकानातील सर्व कपडे व साहित्य जळून खाक झाले. शेजारील मे. आर. एस. पोद्दार या दुकानाला आगीची झळ बसली. आगीत राममेश्‍वर गुळवाले याचे मोठे आर्थिक नुकसान झाले आहे. शॉर्टसर्किटमुळे ही आग लागली असल्याचे बोलले जाते.

आग विझविण्यासाठी अग्निशमन विभागप्रमुख महाजन, वाहन चालक सिद्धार्थ खैरनार, राजेंद्र लहामगे, राहुल पाटील, अमोल सरगर, श्याम कानडे, नरेंद्र बागूल, पांडुरंग पाटील, अमोल सोनवणे, संतोष शिरसाट, योगेश मराठे आदींनी परिश्रम घेतले.