Dhule Crime News : अवैध मद्य विक्री करणाऱ्यांविरुद्ध पिंपळनेर पोलिसांची धडक कारवाई

पिंपळनेर : येथील पोलिसांनी आचारसंहिता लागल्यापासून १५ एप्रिलपर्यंत अवैधरीत्या दारू विक्री करणाऱ्यांविरुद्ध कारवाई करत सोळा गुन्हे दाखल करून आतापर्यंत गावठी हातभट्टीची दारू व कच्चे रसायन पाच हजार ४६८ लिटर व देशी-विदेशी ५२.४२ लिटर मद्य असा एकूण तीन लाख ६० हजार ३६५ रुपये किमतीचा मुद्देमाल जागीच नष्ट करून कारवाई केली. (Dhule Crime Pimpalner police crackdown against illegal liquor sellers)

आगामी लोकसभा निवडणूक २०२४ अनुषंगाने विशेष पोलिस महानिरीक्षकांनी दिलेल्या सूचनाप्रमाणे व पोलिस अधीक्षकांनी घेतलेल्या आढावा बैठकीच्या अनुषंगाने तसेच अपर पोलिस अधीक्षक धुळे, उपविभागीय पोलिस अधिकारी, धुळे ग्रामीण विभाग, साक्री, यांच्या मार्गदर्शनाखाली पिंपळनेर पोलिस ठाण्याचे प्रभारी सहाय्यक पोलिस निरीक्षक सचिन कापडणीस यांनी कारवाई केली.

आगामी लोकसभा निवडणुकीच्या पार्श्वभूमीवर आचारसंहिता लागू झाल्यापासून अवैधरीत्या गावठी दारू बनविणारे व विक्री करणारे तसेच विनापरमिट देशी-विदेशी मद्य विकणारे यांच्याविरुद्ध वेळोवेळी गुप्त बातमीदारामार्फत माहिती काढून पिंपळनेर पोलिस ठाणे हद्दीत विविध ठिकाणी तसेच गुजरात सीमेलगतच्या गावांमध्ये हातोडे चालवून दारूबंदी कायद्यान्वये आताप्रयंत १६ गुन्हे दाखल केले.

तसेच गावठी हातभट्टीची दारू व कच्चे रसायन पाच हजार ४६८ लिटर व देशी-विदेशी मद्य ५२.४२ लिटर असा एकूण तीन लाख ६० हजार ३६५ रुपये किमतीचा मुद्देमाल जागीच नष्ट, हस्तगत करून कारवाई केली.

माहिती कळविण्याचे आवाहन

पिंपळनेर पोलिस ठाण्याचे प्रभारी सहाय्यक पोलिस निरीक्षक सचिन कापडणीस, पोलिस उपनिरीक्षक विजय चौरे, पोलिस उपनिरीक्षक भूषण शेवाळे यांच्यासह पिंपळनेर पोलिस ठाण्यातील स्टाफने कारवाई केली आहे. आपल्या गावातील कोणी अवैध गावठी हातभट्टीची दारू तयार किंवा विक्री करत असेल त्याबाबची माहिती पिंपळनेर पोलिस ठाण्यास कळवावी, असे आवाहन करण्यात आले आहे.