Dhule News : बागायती गव्हासह हरभरा काढण्याची लगबग; दुष्काळात ठिबकने फुलविला रब्बी हंगाम

Dhule News : या वर्षी दुष्काळी स्थिती आहे. उत्तरार्धाचा पाऊसही झाला नाही. रब्बी हंगामाच्या आशाही मावळल्या. मात्र बागायतदार शेतकऱ्यांनी ठिबक आणि तुषार सिंचनाचा खुबीने वापर करून गहू व हरभरा चांगल्या पद्धतीने फुलविला.

सध्या बागायती गहू व हरभरा काढण्याची लगबग सुरू आहे. या वर्षी हार्वेस्टरपेक्षा कापणीने गहू व हरभरा काढण्याकडे कल आहे. यामुळे चारा उपलब्ध होण्यास मदत होत आहे. (Dhule harvesting of horticultural wheat and gram)

धुळे तालुक्यात तीव्र दुष्काळी स्थिती आहे. दिवाळीपासूनच विहिरी व कूपनलिकांची पाणी पातळी खालावली होती. बागायती हंगामावर मोठा परिणाम झाला. शेतकऱ्यांनी विहिरी व कूपनलिकांच्या संभाव्य पाणीपातळीचा विचार करून बागायती हंगाम आटोपता घेतला. गव्हापेक्षा हरभऱ्याची पेरणी अधिक केली.

बहुतांश शेतकऱ्यांनी ठिबक व तुषार सिंचनाने गहू व हरभरा फुलविला. सध्या गहू व हरभऱ्याच्या काढणीस वेग दिला आहे. हार्वेस्टरऐवजी कापणी व थ्रेशरने काढणी व मळणी सुरू आहे.

यामुळे चाऱ्याची उपलब्धता होत आहे. उन्हाळ्याच्या येत्या तीन महिन्यांत मोठ्या प्रमाणात पाण्यासह चाराटंचाई जाणवणार आहे. यामुळे शेतकरी चाऱ्याचे नियोजन करीत आहेत. (latest marathi news)