जिल्हा न्यायालयात आगीत शेकडो फाइल खाक..कोणत्या होत्या त्या फाईल? 

नाशिक : जिल्हा न्यायालयाला पोलिसांच्या ताब्यातील मिळालेल्या अडीच एकर जागेत नव्याने सुरू केलेल्या न्यायालयात आग लागून शेकडो फाइल खाक झाल्या. ही घटना बुधवारी (ता. २७) सकाळी उघडकीस आली. अज्ञात संशयिताने काचा फोडून खिडकीतून ज्वलनशील पदार्थ फेकून आग लावल्याचा अंदाज वर्तविण्यात येत आहे. या आगीत फाइल्स जळाल्याचे पोलिसांनी सांगितले. 
जिल्हा न्यायालयाच्या पाठीमागील बाजूस पोलिसांकडून न्यायालयास अडीच एकर जागा मिळाली आहे. या जागेत नव्याने चार न्यायालय उभारण्यात आले आहेत.

गंगापूर पोलिस ठाण्यातील गुन्ह्यासंदर्भातील फाइल्सची शक्‍यता 
पोलिसांनी दिलेल्या माहितीनुसार आठ क्रमांकाच्या न्यायालयात ही आग लागली. बुधवारी सकाळी न्यायालयाच्या खिडकीतून धूर येत असल्याची बाब लक्षात आली. त्यामुळे तातडीने अग्निशमन दलास सकाळी साडेसातच्या सुमारास याची माहिती देण्यात आली. अग्निशमन दलाने आग विझविली. या न्यायालयात गंगापूर पोलिस ठाण्यातील गुन्ह्यासंदर्भात फाइल्स असल्याचे समजते. न्यायालयीन अधिकारी, वकील यांनी जाळपोळ झालेल्या ठिकाणची पाहणी केली. पोलिसांनी दिलेल्या माहितीनुसार या आगीत फाइल्स, फर्निचरचे नुकसान झाले आहे. याप्रकरणी सरकारवाडा पोलिस ठाण्यात जाळपोळ केल्याप्रकरणी गुन्हा दाखल करण्यात आला आहे. या घटनेमुळे न्यायालयाच्या सुरक्षिततेचा मुद्दा पुन्हा उपस्थित झाला आहे. या आगीत कोणत्या फाइल्स जळाल्या याची माहिती घेतली जात आहे.  
 

हेही वाचा > काय भानगड आहे ही..शासननिर्णय आहे की लग्नपत्रिका?