चाळीसगाव डेपोच्या बसमधून 4 गोणी दारू हस्तगत

धुळे : एसटी महामंडळाच्या बसमध्ये गुरुवारी (ता. ९) चार गोण्या देशी दारू आढळली. हा साठा नेमका कुणाचा आहे, हे अद्याप समजू शकलेले नाही, अशी माहिती आगार व्यवस्थापक स्वाती पाटील यांनी दिली.

चाळीसगाव (जि. जळगाव) आगारातील चाळीसगाव- सुरत बसमधून (एमएच २०, बीएल ३३७५) देशी दारूची वाहतूक केली जात असल्याची माहिती वरिष्ठ स्तरावरून आगार व्यवस्थापक स्वाती पाटील यांना मिळाली. याबाबत त्यांनी त्यांचे सहकारी आणि बसस्थानकातील पोलिसांना माहिती दिली. बस गुरुवारी दुपारी सव्वाच्या सुमारास धुळे आगारात आल्यानंतर पोलिसांनी बसची तपासणी केली.

प्रवासी आसनांवर कोणताही मुद्देमाल आढळला नाही. मात्र, बसच्या एका कप्प्यात चार गोण्या देशी दारू आढळली. या साठ्याची किंमत अंदाजे ४० हजार आहे. सामान कप्प्यात दारू कशी आली, याबाबत विचारणा झाली असता, चालक सुधीर रामदास चव्हाण (रा. मेहुणबारे) आणि वाहक सुभाष अहिरे (रा. चाळीसगाव) यांनी माहिती नसल्याचे सांगितले. शहर पोलिस ठाण्याचे निरीक्षक नितीन देशमुख यांच्या मार्गदर्शनाखाली पथकातील नीलेश पोतदार, कुंदन पटाईत, वैभव वाडीले, शाकीर शेख, प्रवीण पाटील, मनीष सोनगीरे, किरण भदाणे, तुषार मोरे यांनी बसची तपासणी केली.