महा अन्नपूर्णा ऍप' द्वारे मिळणार शिवभोजन 

जळगाव ः राज्य शासनाची महत्त्वाकांक्षी असलेल्या "शिवभोजन' योजना उद्यापासून शहरातील दोन केंद्रावर सुरू होत आहे. पालकमंत्री गुलाबराव पाटील यांच्याहस्ते उद्‌घाटन होईल. केंद्रावर गर्दी होऊन गोंधळ होऊ नये यासाठी पोलिस बंदोबस्त केंद्रावर राहील. जो पहिले येईल त्याला शिवभोजन मिळेल. त्यासाठी आज केंद्र चालकांना प्रशिक्षण देण्यात आले आहे. "महा अन्नपूर्णा' ऍपद्वारे लाभार्थ्यांचा फोटो घेऊन "आयडी' मिळेल, दहा रुपये दिल्यानंतर त्याला शिवभोजन घेता येईल. शहरात दोन केंद्रांना प्रत्येकी 75 थाळी देण्यात येईल. 

राज्यातील गरजू, गरीब नागरिकांसाठी शिवभोजन योजना आहे. दहा रुपयांत त्यांना भोजन मिळेल. मात्र त्यासाठी कोण लाभार्थी असतील याचे निकष नाहीत. यामुळे जो पहिले येईल त्याला शिवभोजन देण्यात येईल. दहा रुपयात जेवण भेटणार असल्याने गर्दी होऊन गोंधळ होईल. यासाठी पुरवठा विभागाने केंद्रावर पोलिस बंदोबस्त मागविला आहे. तसे पत्रही पोलिसांना देण्यात आले आहे. जळगाव जिल्ह्यासाठी या योजनेचा कोटा 700 थाळी एवढा आहे. राज्याचा कोटा 18 हजार थाळींचा आहे. ही योजना प्रायोगिक तत्त्वावर तीन महिन्यांसाठी आहे. 

"महाअन्नपूर्णा ऍप' लॉंच 
शिवभोजन अंतर्गत केंद्र चालकांना आजही प्रशिक्षण देण्यात आले. शिवभोजन देताना "महा अन्नपूर्णा ऍप' डाऊनलोड करून त्याद्वारे शिवभोजनास येणाऱ्या लाभार्थ्यांचा फोटो काढणे, त्याला आयडी देणे, नंतर भोजन देणे या प्रक्रिये माहिती देण्यात आली. 

आर्वजून पहा : "राज्य उत्पादन'च्या दारात आमदारांचा ठिय्या 

दोन ठिकाणी शिवभोजनालय 
- जिल्हा रुग्णालय : साई मल्टी सर्व्हिसेस 
- नवीन बसस्थानक परिसर : क्षुधाशांती केंद्र 
- जो प्रथम येईल त्याला भोजन 
- आधारकार्ड गरजेचे नाही 
- भोजनाची वेळ दुपारी बारा ते दोन 

हेपण पहा : सायकलिस्ट डॉ. सुनील नाईक "सुपर रॅन्दोनर' 
 

शिवभोजन योजनेंतर्गत उद्या (ता.26) दोन ठिकाणी केंद्रे सुरू होतील. बारा ते दोन भोजनाची वेळ आहे. पोलिसांना केंद्रावर पोलिस बंदोबस्तासाठी पत्र दिले आहे. नंतर टप्प्यांनी इतर केंद्र सुरू होईल. 
- सुनील सूर्यवंशी 
जिल्हा पुरवठा अधिकारी, जळगाव