जिल्‍हाधिकारींनंतर आणखी तीनजण कोरोनाबाधित 

धुळे : जिल्हाधिकारी संजय यादव यांना कोरोनाची बाधा झाल्यानंतर धोका लक्षात घेता बुधवारी (ता.३) जिल्हाधिकारी कार्यालयातील अधिकारी-कर्मचाऱ्यांची रॅपिड ॲन्टिजेन टेस्ट करण्यात आली. या चाचणीत आणखी तीनजण कोरोनाबाधित आढळले. 
दोन दिवसांपूर्वीच जिल्हाधिकारी यादव हे कोरोना पॉझिटिव्ह असल्याचे समोर आल्यानंतर त्यांनी जिल्ह्यातील नागरिकांना कोरोनाच्या अनुषंगाने विविध उपाययोजनांसह दक्षता घेणे, नियमांचे पालन करण्याचे तसेच आपल्या संपर्कातील व्यक्तींनीही लक्षणे आढळल्यास तत्काळ चाचणीचे आवाहन केले होते. चाचणीपूर्वी जिल्हाधिकारी श्री. यादव नियमितपणे कार्यालयात येऊन काम करत होते. त्यामुळे अनेक अधिकारी-कर्मचाऱ्यांशी त्यांचा संपर्क येणे स्वाभाविक आहे. या पार्श्वभूमीवर बुधवारी (ता.३) जिल्हाधिकारी कार्यालयातील अधिकारी-कर्मचाऱ्यांची कोरोना चाचणी करण्यात आली. 
 
१४३ जणांची तपासणी 
जिल्हाधिकारी कार्यालयाच्या नियोजन सभागृहात महापालिकेच्या पथकाने अधिकारी-कर्मचाऱ्यांची रॅपिड ॲन्टिजेन टेस्ट केली. महापालिकेचे अतिरिक्त आयुक्त गणेश गिरी, आरोग्य अधिकारी डॉ. महेश मोरे, डॉ. पल्लवी रवंदळे, डॉ. प्रशांत पाटील, अमोल पाथरे, माधुरी कांबळे, उमाकांत बारी यांच्या उपस्थितीत ही करण्यात आली. एकूण १४३ जणांची चाचणी करण्यात आली, त्यातील तीनजण कोरोना पॉझिटिव्ह आढळून आले. जिल्हाधिकारी कार्यालय हे जिल्ह्याचे मुख्यालय असल्याने येथे अनेक नागरिक येत असतात. ही बाब लक्षात घेऊन अधिकारी-कर्मचाऱ्यांची चाचणी करण्यात आल्याचे निवासी उपजिल्हाधिकारी संजय गायकवाड यांनी सांगितले.  

संपादन ः राजेश सोनवणे