PHOTO कॅरम, बुद्धिबळ खेळून कंटाळलात...मग आता हे खेळ खेळा 

भुसावळ : घरी बसून कुटूंबासोबत कॅरम, पत्ते, बुध्दिबळ आदी खेळ खेळुन आता अनेकांना कंटाळा यायला लागला आहे. यावर उपाय म्हणून येथील शिक्षक प्रशांत देवरे यांनी घरातील वस्तु वापरून वीस खेळ तयार केले आहेत. अतिशय सहज खेळता येणाऱ्या या खेळांचे प्रात्याक्षिक ते सोशल मिडीयावर रोज टाकत आहेत.

नक्‍की पहा - कोरोनासाठी यांचा बचाव...निराधारांना घातली अंघोळ 

लॉकडाउन मध्ये कुटूंबासोबत वेळ जावा म्हणून मुलांसोबत नेहमीचे बैठे खेळ खेळण्यास सुरुवात झाली. यात कॅरम, बुध्दिबळ, पत्ते असे नेहमीचे खेळ होते. आता अनेकांना यांचा कंटाळा येऊ लागला होता. मात्र भुसावळच्या अहिल्यादेवी कन्या शाळेत शिक्षक असलेले प्रशांत देवरे यांनी अनोखे खेळ तयार केले आहेत. यात घरगुती गोल्फ या खेळात काठी, पेला, चेंडू एवढेच साहित्य लागते. पेला एका कोपऱ्यात आडवा ठेवून काठीने समोरच्या कोपऱ्यातुन चेंडू तीन टप्प्यांत ढकलत पेल्यात गेला पाहिजे. बांगड्यांवर नाणे ठेवणे या खेळात परातीत तांदूळ घेऊन त्यात दोन बांगड्या खुपसून त्यावर नाणे ठेवणे.

क्‍लिक करा - लॉकडाउनमध्ये जिल्ह्यात याला मिळाली सशर्त सुट...पेट्रोलबाबत हा आहे निर्णय

याव्यतिरिक्त चेंडूवर फेकून वाटीत मणी जमा करणे, चमचा गोटी किंवा हरभरा दाणे शर्यत, गोलात गोटी टाकून निशाणा लावणे, बांगड्या फिरवणे, झाकणाने पाणी भरणे आदी वीस खेळ त्यांनी आतापर्यंत तयार केले आहे. या खेळांचे प्रात्यक्षिक करण्यासाठी त्यांची पत्नी रुपाली देवरे यांचेही त्यांना सहकार्य मिळते. याबाबत श्री. देवरे म्हणाले, मुलं नेहमीचे खेळ खेळून कंटाळले की मोबाईलवर लुडो, सापशिडी आदी खेळ खेळतात. त्यांच्या हातात मोबाईल न देता कोणते खेळ देता येतील याचा विचार मी करत होतो. खरंतर मी तयार केलेले काही खेळ लहानपणी खेळलो होतो. त्याचे नवीनीकरण केले. तर काही खेळ नव्याने सुचले. लॉकडाउन संपेपर्यंत नवनवीन खेळ तयार करण्याचा मानस आहे.

या घरगुती खेळात विरंगुळा होतोच शिवाय एकाग्रता ही वाढिस लागते. माझे खेळ सोशल मिडीयाच्या माध्यमातून देशभरातील एक हजार ४५८ लोकांपर्यंत पोहचत आहे. खेळाची माहिती देताना मराठी व हिंदी भाषेचा वापर करतो. कालच नशिराबादच्या एका मित्राने माझे सर्व खेळ इंग्लंड मधील त्यांच्या नातेवाईकांना फॉरवर्ड केले.
- प्रशांत देवरे, शिक्षक, अहिल्यादेवी कन्या शाळा, भुसावळ.