Video : ऊसाच्या शेतात बिबट्याचे चार बछडे 

पिंपळनेर : देगाव (ता. साक्री) शिवारातील उसाच्या शेतात बिबट्याचे चार बछडे आढळले. या परिसरात बिबट्याच्या मादीचा वावर आहे. ती बछड्यांजवळ दोन दिवसात परतण्याची शक्‍यता लक्षात घेत संरक्षण आणि दक्षतेसाठी वन विभागाने निगराणी ठेवली आहे. 

देगाव येथील शेतकरी भटू जिभाऊ अकलाडे यांच्या शेतात तीन दिवसांपासून ऊसतोडीचे काम सुरू आहे. मजुरांना ऊस तोडणी करताना शेतातील मध्यभागी चार बिबट्याची 2 ते 3 दिवसांचे बछडे आढळले. बछडे अचानक नजरेस पडल्याने मादी बिबट्या जवळपास असण्याच्या शक्‍यतेमुळे सर्वांनी शेताबाहेर पड काढला. मजुरांसह परिसरातील सर्वच शेतकऱ्यांमध्ये भितीचे वातावरण निर्माण झाले. बछड्यांना काही धोका पोहचू नये, म्हणून ग्रामस्थ व मजुरांनी त्वरित ऊसतोड बंद केली. घटनेची माहिती मजुरांनी शेतकरी भटू अकलाडे यांना दिली. अकलाडे यांनी पिंपळनेरचे वनपरिक्षेत्र अधिकारी अरुण माळके यांना माहिती दिली. त्यांनी आपल्या बिट कर्मचाऱ्यांसह घटनास्थळी भेट दिली. कोणत्याही क्षणी बिबट मादी बछड्यांजवळ (शेतात) येऊ शकते, हल्ला करू शकते. 

क्‍लिक करा > बिबट्या आला रे आला नव्हे...लांडगा आला

बछडे निगराणीत 
बिबट मादी रोज आपल्या बछड्यांची जागा बदलते. 5 ते 7 दिवसानंतर बछडे मोठे झाल्यावर या जागेवरून निघून जातील. तोपर्यंत काळजी घेणे आवश्‍यक आहे. वनकर्मचाऱ्यांना देखरेखीसाठी नियुक्त केल्याची माहिती श्री. माळके यांनी 'सकाळ'ला दिली. शेतकरी भटू अकलाडे, सुधीर अकलाडे, प्रशांत अकलाडे, भिकन दहीते आदी उपस्थित होते.