नशिबाने मारले अन् देवाने तारले..महिलेची प्रवेशद्वारावरच प्रसूती

तऱ्हाडी : सकाळची वेळ गावातील शेतकरी (Farmer) , शेतमजूर पोटापाण्यासाठी कुणी मजुरी तर कुणी शेताच्या कामाला गेलेले असताना दिवसभर थकून आल्यानंतर रात्रीची गाढ झोप. त्यातही पहाटेची साखर झोप, अशावेळी ममाणे, (ता. शिरपूर) येथील सपनाबाई दशरथ पारधी या गरोदर मातेला (Pregnant mother)अचानक प्रसूती (Maternity) वेदना सुरु झाल्या. तिला सासूबाई लताबाई दलाल पारधी व सरलाबाई पारधी यांनी पहाटे पाचला बाळंतपणासाठी जवळच्याच तऱ्हाडी आरोग्य उपकेंद्रात (Health Subcentre) दाखल करण्यासाठी आणले.

मात्र प्रवेशद्वाराजवळ आणताच प्रसूती वेदना असह्य होऊ लागल्याने तेथूनच सोबत आलेल्या महिलांनी आरोग्य केंद्रातील डॉक्टरांना जोरजोरात आवाज दिला. परंतु आरोग्य केंद्रातून कुठलाही प्रतिसाद मिळाला नाही. शेवटी ज्याला नाही सहारा तो देवाला प्यारा याप्रमाणे गेट जवळच तिने एका बाळाला जन्म दिला. यामुळे नशिबाने मारले अन देवाने तारल्याचा अनुभव सर्वांनी घेतला.

पारधी या दांपत्याच्या घरची आर्थिक परिस्थिती बेताची असल्याने मिळेल ते काम व त्यातून मिळणारी मोलमजुरी करून आपला उदरनिर्वाह करतात. रविवारी (ता.२२) पहाटे ५ च्या दरम्यान सपनाबाई दशरथ पारधीला प्रसूती वेदना जाणवू लागल्याने सासू लताबाई यांचे सूनबाईच्या वेदना पाहून हृदय पिळवत होते. सूनबाईची प्रसूती सुखरूप व्हावी म्हणून जिवाचे रान करून त्यांनी तऱ्हाडी येथील आरोग्य उपकेंद्राच्या गेटजवळ येताच डॉक्टर व कर्मचाऱ्यांना आवाज दिला. परंतु अपूर्ण कर्मचारी रात्रीच्या वेळेस तर दोनच कर्मचारी त्यांच्यापर्यंत आवाज पोचला नाही. यामुळे अखेर या गरीब महिलेला गेटवरच आपल्या बाळाला जन्म द्यावा लागला. सकाळी बाळ व बाळंतीणीची प्रकृती उत्तम असल्याचे तऱ्हाडी येथील खासगी डॉक्टरांनी सांगितले.

मुख्यालयी न राहण्याबाबत नोटिसा देण्यात येतील. वांरवार तक्रारी आल्याने कायदेशीर कारवाई करणार आहे.
-डॉ. प्रताप पवार, वैद्यकीय अधिकारी प्राथमिक आरोग्य केंद्र विखरण.