देशातील दहापैकी एक "टेक्‍स्टाईल पार्क' जळगावात 

सचिन जोशी
Thursday, 27 February 2020


केंद्रीय वस्त्रोद्योग मंत्रालयाने टेक्‍स्टाईल पार्कबाबत राज्य शासनाकडे प्रस्ताव दिला आहे. राजकारणाच्या पलीकडे जाऊन याबाबत विचार व्हायला हवा. यासंदर्भात पालकमंत्री गुलाबराव पाटील, आमदार किशोर पाटील यांना विनंती केली आहे. मुख्यमंत्र्यांशीही चर्चा झाली असून, त्यांनी तत्त्वत: मान्यता दिली आहे. शासनाने केंद्राच्या या प्रस्तावावर लवकर विचार होऊन त्यास मान्यता द्यावी. 
- उन्मेष पाटील, खासदार, जळगाव 

जळगाव : केंद्र सरकारच्या वस्त्रोद्योग मंत्रालयाने देशभरात दहा ठिकाणी टेक्‍स्टाईल पार्कच्या स्वरूपात "मेगा क्‍लस्टर' प्रकल्प प्रस्तावित केले आहेत. या दहापैकी महाराष्ट्रातील एकमेव पार्क जळगाव जिल्ह्यात साकारणार असून, त्यासाठी राज्य सरकारच्या सहमतीची आवश्‍यकता आहे. मुख्यमंत्र्यांनी त्यासाठी तत्त्वत: मान्यता दिली असून, जळगाव जिल्ह्यात नगरदेवळा येथे एक हजार एकरच्या विस्तीर्ण क्षेत्रात पार्क साकारण्याचे प्रस्तावित आहे. त्यातून सुमारे 30 हजारांवर स्थानिकांना रोजगार उपलब्ध होऊ शकणार आहे. 

तत्कालीन मुख्यमंत्री देवेंद्र फडणवीस यांनी 2016 मध्ये जळगाव जिल्ह्याच्या दौऱ्यात जामनेरला झालेल्या कार्यक्रमात जिल्ह्यात टेक्‍स्टाईल पार्कची घोषणा केली होती. त्यासाठी तत्कालीन मंत्री गिरीश महाजन यांनी जामनेर तालुक्‍यात शंभर एकर जागाही ठरवून दिली. मात्र, त्यानंतरच्या काळात या पार्कच्या उभारणीबाबत कोणतीही प्रक्रिया झाली नाही. आणि आता केंद्र सरकारने देशभरात 10 टेक्‍स्टाईल पार्क उभारण्याचे नवे धोरण आखले आहे. 

नक्की वाचा : अरे वा...142 शेतकऱ्यांची कर्जमाफीची रक्कम प्राप्त 
 

कापूस उत्पादक खानदेश 
मुळातच खानदेश हा कापूस, मका उत्पादनासाठी अग्रेसर आहे. जळगावसह धुळे व नंदुरबार जिल्ह्यात मोठ्या प्रमाणात कापसाचे उत्पादन घेतले जाते. एकट्या जळगाव जिल्ह्यात 8 लाखापैकी 70 टक्के म्हणजे 5 लाख 15 हजार हेक्‍टर क्षेत्रावर कापसाचे उत्पादन घेतले जाते. जळगावसह जामनेर, पाचोरा, भडगाव, चाळीसगाव, पारोळा, एरंडोल, अमळनेर, धरणगाव या तालुक्‍यांत मोठ्या प्रमाणात क्षेत्र कापसाखाली आहे. महाराष्ट्रात कापूस लागवडीखालील क्षेत्राचा आकडा जवळपास 42 लाखांवर आहे. 

आर्वजून पहा : कुटूंबीय लग्नाच्या तयारीत...तेवढ्यात पडला छापा ! 
 

..म्हणून जळगावची निवड 
केळीसोबतच कापूस उत्पादनातील मोठा जिल्हा म्हणून या टेक्‍स्टाईल पार्कसाठी जळगाव जिल्ह्याची निवड राज्यभरातून करण्यात आली आहे. कापूस ते कापड अशी संपूर्ण प्रक्रिया या क्‍लस्टर व पार्कच्या क्षेत्रात होईल. सुमारे एक हजार एकर जागेवर हा प्रकल्प साकार होणार आहे. नगरदेवळा येथे त्यासाठी शासनाची जवळपास तीन हजार एकर जागा उपलब्ध असून, त्यातून या पार्कसाठी जमीन उपलब्ध होऊ शकेल. हा पार्क साकारल्यास खानदेशच नव्हे तर विदर्भातील कापूसही याठिकाणी आणला जाऊन त्यावर प्रक्रिया होऊ शकेल. 

 क्‍लिक कराः  नोट्‌स पद्धतीने  नवाल हॉस्पिटलमध्ये शस्त्रक्रिया यशस्वी; "वर्ल्ड रेकार्ड इंडिया'मध्ये  नोंद 
 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: marathi news jalgaon jalgaon One of ten "textile parks" in the country