नवापूरच्या हिरे दाम्प्त्यांची आगळी समाजसेवा 

नवापूर : आर्थिक परिस्थिती चांगली असलेले अनेकजण सेवाभावी कामात योगदान देत असतात, मात्र आपली परिस्थिती जेमतेम असताना केवळ बेटी बचावच्या उद्देशाने प्रेरित होऊन नंतर समाजोपयोगी कामात गुंतवून घेतलेले अवलिया तसे फार कमी असतात. सलून व्यवसाय आणि कपडे शिवण्याचा व्यवसाय करणाऱ्या येथील प्रदीप व भाग्यश्री हिरे या दाम्पत्याने झोकून देत दीनदुबळ्यांसाठी मोफत स्वेटर आणि उबदार कपडे वाटप करीत आगळा आदर्श घालून दिला आहे. सध्याच्या कडाक्याच्या थंडीत त्यांनी झोपडपट्ट्यांत जात सुमारे सत्तर गरिबांना स्वेटरचे वाटप केले आहे. किमान दीडशे गरजूंना स्वेटर देण्याचा त्यांचा मानस आहे. 

सध्या कडाक्याची थंडी पडत असून उघड्यावर व झोपडपट्टीत राहणाऱ्या गोरगरिबांचे काय हाल होत असतील या भावनेने अस्वस्थ झालेल्या हिरे दाम्पत्यांनी थंडीत माणुसकीची ऊब देण्यासाठी बेटी बचाव अभियानांतर्गत पुढे सरसावले आहेत. गेल्या काही दिवसापासून हे पती पत्नी रात्री शहरात फिरून उघड्यावर व झोपडपट्टीत जाऊन गरजूंना स्वेटर वाटप करत आहेत. त्यांच्या या उपक्रमाने गरजूंच्या लोकांचा चेहऱ्यावर आनंद दिसून येत आहे. लहान मूल व वयोवृद्ध गरजू लोकांना स्वेटर देऊन माणुसकीचा हात बेटी बचाव अभियानाने दिला आहे. 

स्वखर्चाने बेटीबचाव अभियान 
हिरे दांपत्य हे मागील तेरा वर्षांपासून बेटी बचाओ बेटी पढाओ अभियान कोणत्याही शासकीय व सामाजिक मदतीशिवाय स्वखर्चाने राबवीत आहेत. त्यांनी मुलींसाठी विविध स्पर्धा घेतल्या. बक्षीस देऊन मुलींचा आत्मविश्वास वाढवला. महाविद्यालयात जाऊन बेटी बचाओ बेटी पढाओ या विषयावर जनजागृतीही ते करतात. दरवर्षी कस्तुरबा बालिका विद्यालयात महिला दिनाचे कार्यक्रम घेतात. 

गतवर्षी नवापूरमधील एका मुलीचे वडील वारल्याने तिचे दहावीचे शिक्षण थांबले होते. तिला रोख दहा हजाराची मदत करून तिचे शिक्षण पुन्हा सुरू केले. महिन्याच्या प्रत्येक गुरुपुष्य नक्षत्राच्या दिवशी बालक बालिकांना सुवर्णप्राश नामक औषधाचे ड्रॉप घरोघरी जाऊन मोफत वाटप करतात. त्यांच्या कार्याची सामाजिक व शासकीय स्तरावर घेतली जावी अशी मागणी होत आहे