Nandurbar Crime News : अल्पवयीन मुलीचा अत्याचारानंतर खून करणाऱ्या नराधमास जन्मठेप

Nandurbar Crime News : अल्पवयीन मुलीस मिरची पावडर आणण्याच्या बहाण्याने एकाने घरात जबरदस्तीने बोलावून तेथे तिच्यावर लैंगिक अत्याचार करून ठार केले व पुरावा नष्ट करण्याच्या उद्देशाने अंधाराचा फायदा घेत तिचा मृतदेह शेजारील घरात फेकून दिल्याची घटना अक्कलकुवा येथे घडली होती.

त्या प्रकरणातील आरोपीस न्यायालयाने सबळ पुरावे व साक्षीदारांमुळे जन्मठेप व २५ हजारांच्या दंडाची शिक्षा सुनावली.( Murderer who killed minor girl after torture gets life imprisonment nandurbar crime news )

सोरापाडा (ता. अक्कलकुवा) येथील आरोपी कमलसिंग करतारसिंग शिकलीकर याने अल्पवयीन मुलीस मिरची पावडर घेण्याच्या बहाण्याने घरी बोलावून नेले. तेथे तिच्यावर लैंगिक अत्याचार करून घटनेची वाच्यता होऊ नये म्हणून पुरावा नष्ट करण्यासाठी मुलीचा खून करून परिसरातील एका बंद घरात मृतदेह फेकून दिला होता.

ही घटना २३ जानेवारी २०१९ ला घडली होती. मुलीच्या वडिलांच्या फिर्यादीवरून अक्कलकुवा पोलिस ठाण्यात गुन्हा दाखल करण्यात आला होता. पोलिसांनी छडा लावत काही तासांतच आरोपी कमलसिंग करतारसिंग शिकलीकर (वय ३०, रा. सोरापाडा, ता. अक्कलकुवा, जि. नंदुरबार) याला २३ जानेवारी २०१९ ला तत्काळ अटक केली होती.

अक्कलकुवा पोलिस ठाण्याचे तत्कालीन निरीक्षक मेघश्याम डांगे यांनी गुन्ह्याचा तपास करीत महत्त्वाचे पुरावे जमा केले होते. गुन्हा दाखल झाल्यानंतर आरोपी कमलसिंगविरुद्ध दोषारोपपत्र शहादा न्यायालयात सादर केले होते.

अतिरिक्त सत्र न्यायाधीश सी. एस. दातीर यांनी साक्षीदारांचे जबाब, पंच आणि परिस्थितीजन्य पुरावे, तपास अधिकारी यांची साक्ष, सरकारी पक्षाचा युक्तिवाद या बाबींचा विचार करून आरोपी कमलसिंगला जन्मठेपेची शिक्षा व दंडाची शिक्षा ठोठावली.

जिल्हा पोलिस अधीक्षक पी. आर. पाटील, अपर पोलिस अधीक्षक नीलेश तांबे, अक्कलकुवा उपविभागीय पोलिस अधिकारी सदाशिव वाघमारे यांच्या मार्गदर्शनाखाली अक्कलकुवा पोलिस ठाण्याचे तत्कालीन पोलिस निरीक्षक मेघश्याम डांगे यांनी तपास केला.

खटल्याचे कामकाज अभियोग पक्षातर्फे सरकारी अभियोक्ता ॲड. एस. ए. गिरासे यांनी पाहिले. पैरवी अधिकारी म्हणून पोलिस उपनिरीक्षक राहुल भदाणे, सहाय्यक पोलिस उपनिरीक्षक हर्शल रोकडे, गणेश वसावे व पोलिस शिपाई देवीदास सूर्यवंशी यांनी काम पाहिले.