नव्या दमाने कामाला लागा ः अनिल गोटे 

नंदुरबार : जिल्हा परिषद व पंचायत समिती निवडणुकीत "जे झालं ते गंगेला न्हाल' असे समजून पुन्हा कार्यकर्त्यांनी नव्या दमाने कामाला लागा. असा सल्ला राष्ट्रवादी कॉंग्रेस पक्षाचे निरीक्षक अनिल गोटे यांनी कार्यकर्त्यांना राष्ट्रवादी कॉंग्रेस पक्षाच्या कार्यकर्ता मेळाव्यात दिला. यावेळी व्यासपीठावरील पदाधिकारी व उपस्थित कार्यकर्त्यांनी हात उंचावून पक्षाशी प्रामाणिक राहण्याच्या निर्धार केला. 

राष्ट्रवादी कॉंग्रेस पक्षाचा शनिवारी भगवती लॉन्स येथे कार्यकर्ता मेळावा झाला. त्यावेळी श्री. गोटे बोलत होते. यावेळी पक्ष निरीक्षक नाना महाले, अल्पसंख्यांक सेलचे प्रदेश सचिव मुख्तार शेख, जितेंद्र मराठे, राजू पाटील, माधव चौधरी, दादा कापडणीस, सुरेंद्र कुवर, पुष्पा गावित, अश्विनी जोशी, जगदीश माळी आदी उपस्थित होते. राष्ट्रवादी युवक कॉंग्रेसचे माजी जिल्हाध्यक्ष डॉ. अभिजित मोरे यांनी प्रास्तावीक केले. तसेच डॉ. मोरे, शांतीलाल साळी, उपसरपंच डी.जी मोरे, अभियंता बी.के पाडवी, राणूमल जैन आदींनी मनोगत व्यक्त केले. 

हेपण पहा : महा अन्नपूर्णा ऍप' द्वारे मिळणार शिवभोजन

घरांवर पक्षाचे झेंडे लावा 
राष्ट्रवादी कॉंग्रेस पक्षाच्या उमेदवारांच्या निवडणुकीत पराभव झाला. पराभवाने घाबरून जाऊ नये. मी कार्यकर्त्यांच्या पराभव सहन करेन पण लज्जास्पद पराभव सहन करणार नाही. कार्यकर्त्यांनी घरावर झेंडे लावून वातावरण निर्मिती करून गाव तेथे राष्ट्रवादीचे शाखा उघडण्यात यावी अशा सूचना अनिल गोटे यांनी केल्या. 

राष्ट्रवादीमुळे जिल्ह्याचा विकास 
निरीक्षक नाना महाले म्हणाले, की जिल्ह्यातील वाड्या, पाड्यांवरील रस्ते तसेच दुर्गम-अतिदुर्गम भागात विकास राष्ट्रवादी कॉंग्रेस मुळे झाला. पक्ष कोण सोडून गेलं याचा विचार न करता कार्यकर्त्यांनी पक्षकार्य कार्याकडे लक्ष देणे गरजेचे आहे. पक्षापेक्षा कोणीही मोठा होऊ शकत नाहीये. गटातटाचे राजकारण न करता पक्ष नेतृत्वावर विश्वास ठेवा. कार्यकर्त्यांच्या भावना वरिष्ठ पातळीपर्यंत पोचविण्यात येतील असे आश्वासन निरीक्षक महाले यांनी दिले.