नाशिक शहरात विनयभंगाच्या 3 घटना; नागरिकांमध्ये दहशत

नाशिक : शहरात वेगवेगळ्या भागातील दोन अल्पवयीन एका महिलेचा रविवारी (ता. १५) विनयभंग झाला. याप्रकरणी पंचवटी, इंदिरानगर आणि देवळाली कॅम्प पोलिस ठाण्यात गुन्हे दाखल झाले आहे. यापैकी इंदिरानगरच्या गुह्यातील संशयितास पोलिसांनी अटक केली आहे.

अशा आहेत तिघ घटना

पंचवटीतील महिला रविवारी सायंकाळी इमारतीच्या पार्किंगमध्ये बसलेली असताना समोर राहणाऱ्या बाप- लेकाने शिवीगाळ करीत मागील भांडणाची कुरापत काढून महिलेस शिवीगाळ व मारहाण केली. मुलाने लाकडी दांडक्याने मारहाण करीत महिलेचा विनयभंग केला. महिला जखमी झाली असून संशयितांनी तिला जीवे मारण्याची धमकी दिल्याचे दिलेल्या तक्रारीत म्हटले आहे. सहाय्यक निरीक्षक दिनेश खैरनार तपास करीत आहेत.

दुसऱ्या घटनेत अल्पवयीन मुलीच्या आईने तक्रार दाखल केली असून, पोलिसांनी संशयितास अटक केली आहे. अल्पवयीन मुलीच्या अज्ञानाचा गैरफायदा घेत संशयिताने तिच्याशी ओळख वाढविली. सेल्फी काढून नातेवाइकांमध्ये सोशल मीडियाच्या माध्यमातून बदनामी केली. तसेच वेळोवेळी पाठलाग करून विनयभंग आणि लैंगिक फसवणूक केल्याचे म्हटले आहे. इंदिरानगर पोलिस ठाण्यात विनयभंग, बाललैंगिक अत्याचार संरक्षण अधिनियम व माहिती तंत्रज्ञान कायद्यान्वये गुन्हा दाखल करण्यात आला असून, संशयितास अटक केली आहे.

देवळाली कॅम्प भागात मुलगी रस्त्याने पायी जात असताना संशयिताने अडवत विनयभंग केला. घराजवळ गाठत त्याने झालेला प्रकार कुणाला सांगितला तर तुला तोंड दाखविण्यास जागा ठेवणार नाही, अशी धमकी दिली. मुलीने कुटुंबीयांकडे आपबिती सांगितल्यावर हा प्रकार पोलिसात पोचला. अधिक तपास महिला उपनिरीक्षक टी. एस. पवार करीत आहेत.